Komuna e Rahovecit zgjat orarin e punës për mërgimtarët

Foto: Smajl Latifi (Fb)

Disa nga zyrtarët e Komunës së Rahovecit nga 15 korriku do të punojnë me orar të zgjatur, si dhe hapësirat për parking në oborrin e Komunës do t’i lirojnë për mërgimtarët.

Sipas kryetarit të kësaj komune, Smajl Latifit, këto vendime janë marrë me qëllim që bashkatdhetarët të priten sa më mirë gjatë pushimeve të tyre, përcjell albinfo.ch.

“Vendimi i parë ka të bëjë me zgjatjen e orarit të punës për zyrtarët e gjendjes civile, zyrës së pranimit dhe zyrës së tatimit në pronë, të cilët nga 15 korriku do të punojnë deri në orën 18:00 gjatë ditëve të javës dhe nga ora 09:00 deri në orën 12:00 të shtunën, kurse me vendimin e dytë, punëtorët e Komunës obligohen që të lirojnë hapësirat për parking në oborrin e Komunës për mërgimtarët”, ka njoftuar Latifi.

Ai po ashtu ka falënderuar mërgimtarët për kontributin dhe ka premtuar se do t’iu mundësojë qëndrim sa më të mirë në Rahovec.