Lajme

Koronavirusi nuk ishte shkaktari kryesor i vdekjes së fëmijës

Hetimet kishin treguar që infeksioni i koronavirusit nuk ishte shkaku kryesor i vdekjes së fëmijës nga Kantoni St. Gallen, ndonëse kishte pasur test pozitiv

Vdekja e një fëmije të vogël në fund të vitit që shkoi, në spitalin e fëmijëve në St. Gallen në Zvicrën Lindore ka ndodhur për shkak të një infeksioni serioz bakterial të traktit respirator.

Nuk jepet ndonjë informacion më i hollësishëm për moshën e të ndjerit, përveç faktit se ai përfshihet në kategorinë e moshave nga 0 deri 9 vjeç.

Infeksioni me koronavirus nuk ishte shkaku i drejtpërdrejtë i vdekjes së tij, shkruan srf.ch. Kjo u bë e ditur sot nga Kancelaria e Shtetit  e Kantonit St. Gallen, transmeton albinfo.ch.

Vogëlushi ishte testuar dhe kishte rezultuar pozitiv për koronavirusin. Por infeksioni i koronës “më vonë kaloi në një infeksion serioz bakterial të traktit respirator, i cili çoi në vdekjen tragjike të vogëlushit”, thuhet në njoftim.

Ekzaminimet e mëtejshme histologjike do të zgjasin edhe disa javë, përcjell albinfo.ch. Për shkak të mbrojtjes së privatësisë, nuk do të jepet asnjë informacion i mëtejshëm mbi rastin.


LAJME INTERESANTE NGA INTERNETI