Kosovë: Më 21 prill votohet për shkarkim të kryetarëve në veri

Keystone EPA/GEORGI LICOVSKI

Komisioni Qendror i Zgjedhjeve në mbledhjen e sotme ka vendosur që më 21 prill të zhvillohet votimi për shkarkim të kryetarëve në katër komunat në veri, Mitrovicë të Veriut, Leposaviq, Zveçan dhe Zubin-Potok.

Kryeshefi i Sekretariatit të KQZ-së, Burim Ahmetaj, ka thënë se nga peticioni i organizuar në komunën e Leposaviqit, ky komision ka pranuar për verifikim listën me 3,030 nënshkrime, nga të cilat, pas krahasimit me të dhënat e listës votuese të bazuar në numrin personal, rezulton se 2,905 nënshkrues të peticionit janë qytetarë të Kosovës me të drejtë vote në këtë komunë, transmeton albinfo.ch.

Në komunën e Zubin Potokut ka pranuar për verifikim listën me 1,576, nga e cila pas krahasimit me të dhënat e listës votuese të bazuar në numrin personal, rezultoi se 1,380 nënshkrues të peticionit janë qytetarë të Kosovës me të drejtë vote në këtë komunë.

Sa i përket komunës së Zveçanit, Ahmetaj ka thënë se KQZ-ja ka pranuar për verifikim listën me 1,834 nënshkrime dhe pas krahasimit me të dhënat e listës votuese të bazuar në numrin personal, rezulton se 1,714 nënshkrues të peticionit janë qytetarë të Kosovës me të drejtë vote në këtë komunë.

Nga peticioni i organizuar në komunën e Mitrovicës së Veriut janë pranuar për verifikim 4,148 nënshkrime dhe pas krahasimit me të dhënat e listës votuese të bazuar në numrin personal, rezulton se 3,653 nënshkrues të peticionit janë qytetarë të Kosovës me të drejtë vote në këtë komunë.