Kosova

Kosovë: Rrahen dy familje, një person humb jetën

Një person ka humbur jetën si pasojë e një rrahjeje që ka ndodhur mes dy familjeve në fshatin Sodovinë të Vitisë.

Kështu ka njoftuar Prokuroria Themelore në Gjilan, teksa kanë bërë të ditur se ka edhe persona të lënduar, përcjell albinfo.ch.

“Më 2 maj 2019, rreth orës 09:30 minuta, në fshatin Sodovinë e Qerkezve, komuna Viti, si pasojë e një rrahjeje mes dy familjeve, në të cilën janë përdorur mjete të forta, një person është privuar nga jeta, ndërsa disa të tjerë kanë pësuar lëndime trupore. Me të njoftuar me rastin, në vendin e ngjarjes kanë dalë Njësia e Hetimeve Regjionale të Policisë së Kosovës, si dhe prokurori kujdestar, të cilët kanë vëzhguar vendin e ngjarjes, ku prokurori i shtetit ka kërkuar që trupi i pajetë i viktimës të dërgohet në Institutin e Mjekësisë Ligjore për kryerjen e autopsisë”, thuhet në njoftim.

Për këtë rast janë arrestuar pesë persona të dyshuar për veprën penale “Vrasje”, e si shkak që solli deri te vrasja po dyshohet të jetë mosmarrëveshja rreth një kontesti pronësor.

“Dyshohet se ngjarja ka ndodhur pas një mosmarrëveshjeje rreth një kontesti pronësor. Prokuroria Themelore në Gjilan brenda afatit ligjor ndaj të dyshuarve do të ndërmarrë të gjitha veprimet e tjera hetimore”, thuhet tutje në njoftimin e Prokurorisë, përcjell albinfo.ch.