‘Kujtime të ndritura të kohëve të errëta’ i autorit Nysret Hajdari sheh dritën e botimit

Rrugëtimi jetësor ndër vite e dekada i familjes Hajdari nga fshati Tërpezë i komunës së Vitisë, vjen i përmedhur në dy vëllime nga veprimtari i çështjes kombëtar, Nysret Hajdari.

Si 86 vjeçar, autori sjell një histori mbresëlënëse familjare, por edhe të brezit të tij të përshkuar me shumë sfida e sakrifica sa individuale aq edhe familjare, madje duke e kaluar një pjesë të jetës bashkë me të birin e tij Skënderin për disa vite prapa grilave të burgjeve serbo- jugosllave, e që të mos thyhet në asnjë moment as nga torturat, përndjekjet, por që me dekada si një bletë të shënon, mbledh, ruaj e të nxjerr në letër  ngjarje e kujtime, sa sot të kemi në dorë jo vetëm një libër kapital e me një index prej mijëra emrash, por edhe një dokumentar të vërtetë kohe për një periudhë kohore prej plot 8 dekadash.

Libri nis me një dedikim nga autori të cilin po e sjellim të plotë në vijim:

Gjyshit tim, Hajdarit, të masakruar nga forcat bullgare;  Gjyshes sime, Rabishes, që na rriti ne, gjysmë-jetimëve;  Babait tim, Islamit, që na rriti e na edukoi me ndershmëri;  Nënës time, Arzijes, që vdiq shumë e re nga tuberkulozi;  Motrës Hatixhes, Havës, vëllait Ilazit dhe motrës Hatixhes së dytë, që vdiqën në lulen e rinisë; dhe Mehrijes që na la shumë herët; Xhaxhallarëve: Kurteshit dhe Hajrushit, që luftuan me pushkë kundër forcave partizano-çetnike të Jugosllavisë pushtuese; Rinisë heroike shqiptare të vitit 1981 e të viteve në vazhdim; Rreth 2400 dëshmorëve të UÇK-së të rënë për liri; Mijëra shqiptarëve të vrarë e të masakruar nga forcat serbe  gjatë Luftës Çlirimtare në vitet 1998-1999; Pasardhësve të mi në Zvicër dhe në Kosovë; Secilit shqiptar që i rrah zemra për Bashkim Kombëtar

Falënderimi ndaj shtetit zviceran

Autori, Nysret Hajdari, që mban pseudonimin Fitim Fitimi, shkruan mes tjerash edhe një falënderim:

Me rastin e botimit të të dy vëllimeve të librit tim me titull: “Kujtime të ndritura të kohëve të errëta”, një falënderim të veçantë e kam për konsulentët e librit: Xhevat Hasanin, Salih Bytyqin, Muharrem Blakajn dhe Avni Azizin. Ata me këshillat dhe sugjerimet e tyre kanë bërë, që të dy vëllimet e librit të kenë shije estetike, strukturim dhe renditje më të mirë kronologjike, të temave dhe të çështjeve që kam trajtuar.”

Sa i përket përmbajtjes – gjykimeve dhe vlerësimeve të bëra nga unë në të dy vëllimet e librit, të gjitha të drejtat dhe përgjegjësitë ia kam rezervuar vetës. Sepse ndryshimi i përmbajtjes së tyre nga kushdo qoftë (qoftë edhe nga një redaktor profesionist), do të më bënte të mos ndihem autor i librit.

Isuf Ismailin e falënderoj që në cilësinë e lektorit ka bërë që të dy vëllimet e librit tim, të frymojnë sipas drejtshkrimit të gjuhës shqipe.  Për mbështetjen morale gjatë shkrimit dhe për përpunimin teknik të librit, e falënderoj djalin tim Skënder Hajdarin.  Bashkëshorten time Xhemile Hajdarin e falënderoj si për mbështetjen morale, ashtu edhe për rikujtimin e shumë ngjarjeve, për të cilat kam shkruar në vëllimet e librit.

Një falënderim të posaçëm kam edhe për Zvicrën, shteti i cili më strehoi mua dhe familjen time në momentet më të vështira të ekzistencës sonë si familje.

Së fundi e falënderoj secilin shok e mik, që qoftë edhe me një fjalë të vetme, më ka inkurajuar për shkrimin e kujtimeve të mia.