Uncategorized

Ç’ vendime mori Qeveria Kurti në mbledhjen e pestë

Kryeministri i vendit, Albin Kurti, në llogarinë e tij në Instagram ka treguar për vendimet që i ka ndërmarrë Qeveria në mbledhjen e pestë të saj.

Ai ka thënë se Qeveria po angazhohet për jetësimin sa më të mirë e përmbajtjesor të tri temave kryesore: drejtësia, zhvillimi ekonomik dhe marrëdhëniet ndërkombëtare.

Ndalja e gjakderdhjes financiare

U anulua vendimi i Qeverisë së kaluar, ku kompanisë “Bechtel-Enka” do t’i kalonin 50 milionë euro. Ka nevojë për kyçje e mbikalim në autostradën e mbyllur, por jo 50 milionë euro. Mundet ndryshe, më mirë e më lirë.

Dy borde

Pas shkarkimit të tyre të mëhershëm, i emëruam bordet e përkohshme në Telekomin e Kosovës dhe Ndërmarrjen “Trepça” Sh.A. Këto dy borde të përkohshme, sipas ligjit për Ndërmarrjet Publike, do të jenë në funksion deri në ardhjen e një bordi të ri apo deri në mesnatën që bëhen gjashtë muaj prej ditës së hyrjes në fuqi të këtij ligji.

Sanksionet

Në listën e sanksioneve të OKB-së e BE-së ndodhet një kompani, e cila ka eksportuar drejt vendit tonë dhe ku tash e tri javë po mbahet në Doganën e Kosovës. Kompanisë “Sabalan Company – Iran”, e cila figuron si entitet nën sanksione si kompani mbulesë e “Shahid Hemat Industrial Group – SHIG”, me vendim unanim të Qeverisë së Republikës së Kosovës iu vendosen sanksione edhe për vendin tonë, përcjell Albifo.ch.