Kurti rithekson gatishmërinë për të nënshkruar marrëveshje më 18 mars

Para takimit të Ohrit, kryeministri i Kosovës, Albin Kurti, edhe një herë ka shprehur gatishmërinë për të nënshkruar një marrëveshje më 18 mars, për normalizim të marrëdhënieve me Serbinë. “Siguria dhe paqja në rajon e Evropë është mëse e nevojshme. Ne jemi të gatshëm të bëjmë përparim, edhe përkundër sfidave të mëdha”, ka thënë Kurti.

Tutje ai ka shtuar se Marrëveshja bazë është avancim drejt njohjes reciproke mes të dyja vendeve si dhe normalizimi kërkon respektim të të drejtave të minoriteteve. “Ne besojmë se Marrëveshja bazë mes Kosovës dhe Serbisë përmban një avancim drejt njohjes së ndërsjellë mes dy shteteve. Besojmë se normalizimi i plotë i marrëdhënieve kërkon një njohje të ndërsjellë në qendër të marrëveshjes, si dhe respektim për të drejtat e minoriteteve në të dy shtetet”, ka shtuar Kurti.

Tutje ai ka thënë se shpreson që refuzimi i Serbisë për të nënshkruar propozimin në Bruksel nuk është indikacion se nuk pajtohen me përmbajtjen e marrëveshjes. Kreu i Qeverisë i ka bërë këto komente në një videomesazh dërguar Forumit  të Universitetit të Manheimit në Gjermani.

Më 27 shkurt, Kryeministri i Kosovës, Albin Kurti, dhe Presidenti i Serbisë, Aleksandar Vuçiç, u takuan në Bruksel me ndërmjetësim të Bashkimit Evropian dhe pranuan Planin Evropian për normalizim të marrëdhënieve. Ndonëse nuk nënshkruan asnjë marrëveshje, këtë do të tentojnë ta bëjnë më 18 mars në Ohër.

---