Maqedoni e Veriut: Arrin në 51 numri i viktimave nga koronavirusi

Në Maqedoninë e Veriut janë shënuar edhe dy vdekje të reja nga koronavirusi, duke shkuar kështu numri total i viktimave në 51 persona.

Ministri i Shëndetësisë, Venko Filipçe, ka njoftuar për dy viktima të reja, një në Shkup i moshës 66 vjeçe dhe një tjetër i moshës 83 vjeç në qytetin e Prilepit.

Numri më madh i viktimave, gjithsej 13, është në qytetin e Kumanovës ndërsa më pas vjen Struga me 10 dhe Shkupi me 9 viktima.

Ministri i Shëndetësisë ka njoftuar edhe për 37 raste të reja ne koronavirus që shkakton sëmundjen COVID -19. Prej tyre, 9 të infektuar janë regjistruar në Kumanovë dhe 8 në Shkup, ndërsa numër më i vogël në 5 qytete tjera. Numri i përgjithshëm i personave të infektuar ka arritur në 1,207.

Drejtuesit e institucioneve ndërkohë kanë vazhduar me thirrjet drejtuar qytetarëve, në veçanti besimtarëve që të mos dalin nga shtëpitë gjatë festës së Pashkëve dhe të respektojnë masat e qeverisë për mbrojtje nga përhapja e koronavirusit.

Në gjithë vendin nga e premtja ka hyrë në fuqi ora policore për kufizimin e plotë të lëvizjes deri në orën 05.00 të mëngjesit të ditës së martë.

Qeveria e Maqedonisë së Veriut të shtunën njoftoi se nga fillimi i muajit maj do të nisë me lehtësimin e masave shtrënguese kundër koronavirusit.

“Ne po bëjmë një plan serioz, që pas 1 majit, të nisim me lehtësimin e disa prej masave, të cilat do të jenë në funksion të kthimit të jetës në normalitet”, ka deklaruar kryeministri Oliver Spasovski, përcjell Albinfo.ch.