Mbyllet terminali doganor i Hanit të Elezit

Terminali doganor në Han të Elezit do të mbyllet sonte për shkak të mungesës së licencës.

Këtë lajm e ka konfirmuar zëdhënësi i Doganave të Kosovës, Adriatik Stavileci.

“Terminali doganor është pezulluar përkohësisht nga sonte në orën 24:00, në mungesë të licencës nga ministria përkatëse. Në momentin që pajiset me licencë nga Ministria e Infrastrukturës, do të vazhdojë operimi nga Dogana”, thotë Adriatik Stavileci, shkruajnë mediat kosovare, përcjell albinfo.ch.

Sonte pas orës 24:00 të gjithë kamionët duhet të devijojnë në terminale të tjera.

Kurse dërgesat që janë në terminal dhe ato që hyjnë deri në orën 00:00 do të vazhdojnë të zhdoganohen ditët në vijim.

Ndërkohë stafi në zyrë do të vazhdojë punën deri në njoftimin e radhës.

---