Më 15 dhjetor, Kosova zyrtarisht bëhet me kodin +383

“Kosova më në fund do ta kodin e vet telefonik ndërsa të gjitha kodet ekzistuese 381, 377, 386 do të shuhen”, tha ministrja për Dialog Edita Tahiri

Delegacioni i Kosovës që po merr pjesë në bisedimet me Serbinë në Bruksel, ka konfirmuar vendimin zyrtar të BE-së, se me 15 dhjetor ITU (Organizata Ndërkombëtare për Telekomunikacion e OKB-së) do t’ia ndaj përfundimisht Kosovës kodin telefonik +383. Sipas përfaqësuesve të Prishtinës, për herë të parë në histori Kosova do ta ketë kodi telefonik shtetëror.

Sipas një kumtese për media lëshuar nga Zyra për Informim e Ministres për Dialog, Edita Tahiri, me marrjen e kodit të vet telefonik shtetëror, Republika e Kosovës e fiton sovranitetin shtetëror në fushën e telekomunikacionit, i cili do të njihet nga bashkësia ndërkombëtare.

“Në bisedimet që zgjaten tre ditë në Bruksel e që përfunduan sonte, u konfirmuan obligimet finale zbatuese për çështjen e kodit shtetëror telefonik për Kosovën. Ky proces u përmbyll me sukses me ndërmjetësimin e Bashkimit Evropian, me të cilin u konfirmua se në bazë të Marrëveshjes për telekomin ashtu siç është paraparë me planin për zbatim për telekomin, ITU do t’ ia ndaj Kosovës kodin telefonik 383 me datë 15 dhjetor 2016”, thotë ministrja Tahiri.

Sipas saj, Republika e Kosovës është pronare e kodit telefonik 383 dhe Kosova do të ketë të gjitha të drejtat shtetërore që të administroj me kodin e vet telefonik sikur gjithë shtetet tjera.

“Kosova më në fund do ta kodin e vet telefonik ndërsa të gjitha kodet ekzistuese 381, 377, 386 do të shuhen”, tha ministrja Tahiri, sipas të cilës, kodi i ri i shuan të gjithë operatorët ilegal të telefonisë mobile dhe fikse të Serbisë në Kosovë.

Ajo po ashtu edhe njëherë e rikonfirmoi se të gjitha thirrjet nga Kosova në Serbi dhe anasjelltas do të jenë thirrje ndërkombëtare.

Tahiri tha marrëveshja për kodin telefonik do të ketë efekte pozitive të shumëfishta, si në planin shtetëror, të sovranitetit, ekonomik dhe telekomunikues.

“Gjatë këtyre bisedimeve nga pala e Kosovës u konfirmua se autorizimi  i përkohshëm dhe i kufizuar në telefoni mobile do të realizohet sipas planit në ditën që Kosova e merr kodin e vet telefonik nga ITU, pala serbe konfirmoi se letra që Serbia do të ia dërgoj ITU-së ku shpreh pajtimin për kodin telefonik për Kosovën do të realizohet në afatin e paraparë. Delegacionet e dyja shteteve konfirmuan para BE-së se këto dokumente janë në pajtim të plotë me Marrëveshjen e Brukselit për telekomin dhe planin aksionar”, tha ajo.

Ministrja Tahiri tha se e falënderojmë Bashkimin Evropian për ndërmjetësimin efektiv të kësaj Marrëveshje për telekomin dhe se ky proces po rezulton me sukses duke dëshmuar suksesin e radhës së Dialogut të Brukselit.