Mërgimtarët do të regjistrohen

Qeveria e Kosovës ka vendosur t’i regjistrojë mërgimtarët kosovarë. Sipas qeverisë, regjistri do të përmbajë të dhënat për numrin, moshën, gjininë, profesionin, ekonomitë...

Qeveria e Kosovës ka marr vendim që të nis procedurat për regjistrimin e të gjithë qytetarëve të Kosovës që jetojnë në Diasporë, përfshirë regjistrimin e ekonomive familjare dhe bizneseve. Me këtë vendim qeveria dëshiron të heq dilemat rreth asj se sa mërgimtarë ka vendi.

Qeveria e Kosovës miratoi koncept-dokumentin, i cili shtron nevojën për krijimin e një baze të të dhënave të mërgimtarëve dhe evidentimin e shpërndarjes së tyre në vendet e ndryshme të botës.

Sipas një komunikate lëshuar nga qeveria, regjistri i mërgimtarëve do të përmbajë të dhënat për numrin, moshën, gjininë, profesionin, nivelin e arsimit, fuqinë e tyre intelektuale dhe ekonomike, organizimin e tyre në shoqata dhe organizime tjera.

“Krijimi i një pasqyre të drejtë të shtrirjes gjeografike, numrit, potencialit intelektual-ekonomik dhe social të diasporës do të mund të vihet në shërbim të zhvillimit të vendit”, thuhet në komunikatën e qeverisë, raportojnë mediat në Prishtinë.

Ndryshe, Institucionet e Kosovës janë të vetmet në rajon që nuk e dinë se sa popull përfaqësojnë në diasporë. Në dekadën e fundit janë dhënë shifra të ndryshme nga 300 mijë, në 500 mijë e 700 mijë kosovarë që jetojnë jashtë vendit.

 Që këto shifra të zyrtarizohen, Prishtina zyrtare do ta regjistrojë diasporën.  

Këtë ide e ka ngritur disa muaj më parë ministri kosovar i Diasporës, Ibrahim Makolli, i cili ka parashikuar që në vitin 2013 të nisin procedurat për regjistrimi e kosovarëve që jetojnë jashtë atdheut.

Ndërsa shifrat e fundit që kanë dalë nga regjistrimi i përgjithshëm i popullsisë, ekonomive familjare dhe banesave, regjistrimin në diasporën e ka bërë nevojë imediate, për faktin se, shifrat e frymorëve të regjistruar kanë një dallim minimal me regjistrat e votuesve.

Sipas regjistrimit të fundit të popullsisë, Kosova ka mbi 1.7 milionë banorë rezident. Kjo shifër ka nxjerrë disa dilema, për faktin se ka variuar relativisht shumë nga regjistrimet e mëparshme, ai i vitit 1981 dhe regjistrimi i dhunshëm i Serbisë i vitit 1991.