Merruni me politikën e Zvicrës, ju del më mirë

Çmenduria më e madhe e këtyre debateve të koalicioneve parazgjedhor të Kosovës, janë një pjesë e shqiptarëve që jetojnë në Zvicër. (Ndoshta në Diasporë në tërësi, por në Zvicër jetoj dhe e shof nga afër).Kjo urrejtje patetike mes klaneve partiake; shtyrja me muskuj në mënyrë primitive; ofendimet dhe provokimet; etiketimet e nivelit më të ulët; hipnotizimi i një shoqërie të tërë vetëm për poste qeverisëse. Shqiptarët kudo ku janë krenohen për çdo arritje të shqiptarëve në Zvicër, me të drejtë.

Por harrojnë që shumica dërrmuese e shqiptarëve këtu, as që merr pjesë në këtë debat për politikën e Kosovës, e lere më të marrin pjesë në zgjedhje. Një pjesë e tyre, madje edhe ata të gjeneratës së dytë, siç duket u ka ngelur si trashëgim, janë ende në mendësinë e përçarjeve të viteve 90-të. Dhe për fat të keq, s’kanë mësuar ASGJË nga fryma politike e Zvicrës, ku garat nuk bëhen me të fortin e partisë, por me programe politike; ku partite politike dhe mbështetesit e saj flasin në mënyrë të qytetëruar dhe me respekt ndërmjet veti.

Merruni me politikën e Zvicrës, ju del më mirë. Sepse këtu po jetoni, këtu paguani taksat, këtu po shkolloheni dhe këtu do zhvilloni të ardhmen tuaj. Pastaj, kur të brendësohet kultura e qetë politike e Zvicrës në mendësitë tuaja, do jeni edhe më të kthjellët të merreni me politikat e Ballkanit. Me urrejtje nuk arrihet asgjë.

---