MI: Rrugët në Kosovë, të kalueshme, kujdes gjatë vozitjes

Ministria e Infrastrukturës e Kosovës njofton se të gjitha rrugët regjionale, nacionale dhe autoudhët në Kosovë janë të kalueshme, por që kërkohet nga ngasësit të mos udhëtojnë pa pajisje dimërore dhe ta përshtatin shpejtësinë. “Që nga mesnata kur edhe kanë filluar reshjet e para të borës, kompanitë e kontraktuara nga ministria i kanë ndërmarrë masat e nevojshme për mirëmbajtjen e rrugëve, në mënyrë që ato të jenë të kalueshme dhe të sigurta për qarkullim rrugor”, thuhet në njoftim.

Ndërsa rrugët me vështirësi të kalueshme janë në Prevallë, Rugovë e Bajgorë, përcjell albinfo.ch.

Ministri i Infrastrukturës së Kosovës, Pal Lekaj, në një postimi në rrjetin social Facebook ka kërkuar kujdes më të shtuar nga ngasësit e veturave.  “Në orët e para të mëngjesit jam informuar nga të gjithë menaxherët rajonalë se kompanitë e kontraktuara janë duke punuar në pastrimin e rrugëve nga bora. Si rezultat, qytetarë të dashur, këtë të diele mund të lëvizni lirshëm”, ka shkruar ai.