Mjekja shqiptare në Gjermani: Të respektohen rregullat si masë kundër përhapjes së virusit

Marsela Ceno,

Mjekja Marsela Ceno, drejtuese e Shoqatës së Mjekëve Shqiptarë në Gjermani, flet për lehtësimin e masave dhe rëndësinë e respektimit të rregullave për kufizimin e përhapjes së virusit në Shqipëri dhe Gjermani, transmeton albinfo.ch.

Shqipëria po shënon numër më të lartë të të infektuarve me Covid-19, që prej fillimit të pandemisë, plot 42 raste në 24 orë. Kjo sipas specialistëve, për shkak të neglizhencës së treguar nga qytetarët pas lehtësimit të masave.

Ndryshe është duke ndodhur, të paktën në pjesën më të madhe të rajoneve gjermane, ku duket se kurba e infeksionit është në rënie, madje disa zona prej shumë ditësh nuk kanë raportuar raste të reja.

Këtë e konfirmoi edhe mjekja Marsela Ceno, drejtuese e Shoqatës së Mjekëve Shqiptarë në Gjermani.

Doktoreshë Marsela u shpreh se gjermanët vazhdojnë të jenë “besnikë” të karakterit të tyre të ftohtë, duke respektuar distancën sociale dhe të gjitha masat e tjera higjieno-sanitare, si përdorimimi i maskës në supermarkete, në qendrat e fitnesit, në parukeri e kudo tjetër. Veçohen së fundmi  raste të shtuara vetëm pas protestave të ndodhura në disa qytete gjermane, por situata është nën  kontroll dhe sistemi shëndetësor vazhdon të jetë në gatishmëri edhe nëse një valë e dytë e infeksionit mund të prekë vendin. /Albinfo.ch