Mohikani i fundit i lirikës zvicerane Brechbühl fiton çmimin e madh “Naim Frashëri”

Isuf Sherifi e quan Beat Brechbühl si “mohikani i fundit i lirikës në Zvicrën lindore,” shkruan tagblatt.ch.

Poeti zviceran Beat Brechbuhl është fitues i çmimit të madh “Naim Frashëri” të Edicionit 22 të Festivalit Ndërkombëtar të Poezisë “Ditët e Naimit”. Ky është vendimi i Jurisë së Festivalit i përbërë nga studjuesi i letërsisë, Prof. dr. Ymer Çiraku, poeti dhe kritiku Ndue Ukaj dhe poeti Isuf Sherifi. Gjithashtu, Drejtoria e Festivalit e ka shpallë Laureatin e sivjetshëm edhe Anëtar Nderi të Festivalit. FNP “Ditët e Naimit” mbahet prej 18 – 22 tetor 2018, në qytetin e Tetovës.

Botuesi dhe shkrimtari zviceran Beat Brechbühl është autor i një vargu të gjatë veprash letrare, të cilat, deri më sot përmbledhin 22 vëllime në: poezi, romane, tregime, si dhe libra për fëmijë. Kohëve të ndryshme, autori i kësaj krijimtarie të gjerë dhe me dimensione të larmishme zhanrore e stilistike, ka fituar disa çmime letrare të rëndësishme. Veprat e Beat Brehbühl janë botuar në shumë gjuhë të botës. Nga viti 1980, ai është drejtues i shtëpisë botuese “Waldgut” në Frauenfeld. Është anëtar i Shoqatës së Autorëve të Zvicrës.

Ky çmim për autorin zviceran vjen pas propozimit të anëtarit të jurisë Isuf Sherifiri, i cili e ka njohur prej kohësh shkrimtarin zviceran, shkruan albinfo.ch. Isuf Sherifi e quan Beat Brechbühl si “mohikani i fundit i lirikës në Zvicrën lindore.” Sherifi gjithashtu ka kontakte të ngushta edhe me lirikët tjerë të Zvicrës lindore: Ivo Ledergerber und Fred Kurer, Christine Fischer und Beat Brechbühl.

Në Festivalin Ndërkombëtar të Poezisë “Ditët e Naimit” do marrin pjesë edhe shkrimtarë tjerë të njohur si Abdellatif Laabi nga Marokoja dhe Eva Lipska nga Polonia.

---