Lajme

NASA nis kërkimet për ujë në Hënë

Pyetjes nëse ka apo jo ujë në Hënë po përpiqet t’i japë përgjigje NASA. Agjencia hapësinore amerikane njofton se ka zgjedhur zonën e Polit Jugor të Hënës, ku do të dërgojë roverin e parë robotik në kërkim të ujit.

Agjencia tha se roveri, i quajtur VIPER, do të ulet në Hënë për të eksploruar sipërfaqen dhe nëntokën për ujë dhe burime të tjera. Roveri do të shpenzojë 100 ditë duke kërkuar për burimet e ujit.

Zona që do të studiohet mbulon një sipërfaqe prej 93 kilometra katrorë. Pajisja hapësinore është sa madhësia e një karroce golfi dhe do të kërkojë në rezervat e ujit të akullit deri në një metër nën sipërfaqen hënore.

Roveri do të mbledhë mostra që do t’i lejojë shkencëtarët të kuptojnë më mirë shpërndarjen e burimeve në Hënë.

Anijet kozmike që rrotullohen rreth Hënës tashmë kanë identifikuar shenja uji në polin jugor, por NASA nuk e di saktësisht se ku është ai ujë apo si është përbërja e tij kimike.

“Aty ku ka ujë, ka karburant”, është shprehur administratori i NASA-s, Bill Nelson.

Agjencia hapësinore shpreson të krijojë një bazë të përhershme në Hënë, pastaj ta përdorë atë për të nisur misionet e para njerëzore në Mars./Euronews