Në Rashkë dyshohet edhe për dy varreza masive

Hetuesit po gërmojnë edhe në dy lokacione të tjera ku dyshohet se janë varrosur rreth 400 shqiptarë të vrarë gjatë luftës së fundit (1998-1999)

Në Rudnicë të Rashkës në Serbi deri më tani janë zbuluar më shumë se 44 trupa të shqiptarëve të varrosur në një varrezë masive, ndërsa hetuesit po gërmojnë edhe në dy lokacione të tjera ku dyshohet se janë varrosur rreth 400 shqiptarë të vrarë gjatë luftës së fundit (1998-1999).

Siç raportojnë mediet kosovare, në afërsi të lokacionit ku po gërmohen, janë identifikuar edhe dy vende, ku pritet të zhvillohen gërmime nën dyshime për varreza masive. Sipas të dhënave që ka pala kosovare, në të tri lokacionet mund të jenë të varrosur rreth 400 shqiptarë.

Ndërkohë autoritetet serbe kanë thënë se në Rudnicë mund të jenë varrosur rreth 300 persona të vrarë gjatë luftës.

Drejtori i Departamentit të Mjekësisë Ligjore në Ministrinë e Drejtësisë, Arsim Gërxhaliu, ka thënë se deri më tani në Rudnicë të Rashkës kanë gjetur 45 trupa relativisht të kompletuar mirë, derisa kanë nxjerrë edhe 87 mbetje mortore që nuk janë kompletuar.

Ai ka thënë se identifikimi i personave të gjetur në këtë varrezë masive do të fillojë të bëhet këtë ose javën tjetër.

Varreza në Rudnicë afër Rashkës në Serbi është zbuluar vitin e kaluar nga institucionet ndërkombëtare. Atje gjurmimet antropologjike kanë filluar vitin e kaluar, ndërsa dyshohet se aty janë varrosur rreth 400 shqiptarë. Trupat e shqiptarëve tyë vraraë ishin dërguar atje për t’i fshehur gjurmët e krimit.

Gjatë luftës së fundit në Kosovë (1998-1999) janë zhdukur 5650 persona. Më shumë se 3200 janë identifikuar nëpër disa varreza masive në Serbi, si në Batajnica, Bajna-Bashta, Peruçac, në lumin Danub, etj, dhe janë riatdhesuar në Kosovë me ndihmën e Kryqit të Kuq Ndërkombëtar. Ndërsa edhe 1710 janë ende të zhdukur.