Një drekë e përbashkët në shenjë respekti dhe mirënjohjeje

Takimi i fundvitit i mësuesve të shkollave shqipe në Zvicër u shoqërua me një drekë të organizuar nga sipërmarrësja e suksesshme në Zvicër, Znj. Merita Pinta

Takimi i fundvitit i mësuesve të shkollave shqipe në Zvicër, i mbajtur më 14 dhjetor 2025, në Restorant Dorint në Bad Zurzach, u shoqërua me një drekë të përbashkët të organizuar nga sipërmarrësja e suksesshme në Zvicër, Znj. Merita Pinta. Ky organizim u bë në shenjë respekti dhe mirënjohjeje për mësuesit e shkollave shqipe, të cilët kohëve të fundit janë jo vetëm vlerë e shtuar e LAPSH “Naim Frashëri”, por edhe një histori e vërtetë suksesi.

Për Znj. Merita Pinta, ky takim nuk ishte vetëm një përkrahje e zakonshme dhënë mësuesve por edhe një moment festiv, për të ardhmen e arsimit shqip në diasporë.

Në fjalën e tij përshëndetëse, bashkëkryetari i LAPSH-it “Naim Frashëri”, z. Vaxhid Sejdiu, me fjalë të zgjedhura dhe mirënjohëse, falënderoi Znj. Merita Pinta për mbështetjen e vazhdueshme, për përkushtimin dhe për shembullin frymëzues që ajo jep si sipërmarrëse dhe si mbështetëse e arsimit shqip në Zvicër. Ai theksoi se përkrahja e njerëzve me vizion dhe zemër të hapur për gjuhën shqipe është një shtyllë e rëndësishme e suksesit të shkollave shqipe dhe e vetë LAPSH-it.

Fjalët përshëndetëse të z. Vaxhid Sejdiu dhe znj. Merita Pinta krijuan një atmosferë të ngrohtë, mikpritëse dhe bashkëpunuese, ku dominoi hareja, respekti dhe mirënjohja e ndërsjellë. Mësues nga disa kantone të Zvicrës u takuan në këtë fundvit me falënderime dhe përgëzime për njëri-tjetrin, me urime të përzemërta dhe me gatishmëri të plotë për të përkrahur edhe në të ardhmen stafin e shkollave shqipe dhe njëri-tjetrin, me qëllim që edhe viti i ardhshëm të jetë po aq i suksesshëm, në mos më shumë.

Në përmbyllje të takimit, znj. Merita Pinta, biznismene dhe drejtuese e Qendrës Prima Pflege në Bad Zurzach, kishte përgatitur për secilin mësues nga një dhuratë simbolike, duke i përgëzuar ata për punën e palodhshme dhe përkushtimin në shërbim të arsimit shqip. Ky gjest mirënjohjeje i dha takimit një dimension edhe më njerëzor dhe motivues.

Nga ana tjetër, edhe stafi i Shkollës Shqipe – LAPSH “Naim Frashëri” kishte përgatitur një dhuratë simbolike për Znj. Merita Pinta, në shenjë falënderimi për organizimin dhe mbështetjen e vazhdueshme që ajo, ndër vite, i ka dhënë shkollës shqipe.

Nuk kishte gjë më të bukur sesa të shihje mbi 30 mësuese dhe mësues të lumtur, të gëzuar dhe të motivuar për punë, të bashkuar në angazhim dhe përkushtim në shërbim të gjuhës shqipe dhe të fëmijëve shqiptarë. Ky takim ishte dëshmi e qartë se kur ka bashkim, respekt dhe vizion të përbashkët, suksesi nuk mungon. 🇦🇱✨

Sektori për informim

 

---