Nxënësit e shkollës shqipe në Zvicër festuan semimaturën

Nxënësit e shkollës shqipe të Kantonit të St. Gallenit dhe të Kantonit të Argaut (pikave shkollore të Birr-it, Brugg-it, Neuenhof-it dhe të Shpreitenbach-it), si dhe të shkollës shqipe të Affoltern am Albis-it, të shtunën me 29. Qershor 2019, në sallën e shkollës sekundare në Uster të Cyrihut, festuan mbrëmjen e semimaturës.

Ndeja e asaj nate filloi me një përshëndetje nga mësuesi Vaxhid Sejdiu, njëherësh kryetar i Këshillit të Arsimtarëve të Kantonit të St. Gallenit, i cili i përgëzoi nxënësit për suksesin e shkëlqyeshëm dhe u dëshiroi mirëseardhje prindërve dhe mysafirëve.

Pjesë e kësaj nate ishte ambasadori shqiptar, Ilir Gjoni, i cili përshëndeti nxënësit dhe punën e mësuesve për ruajtje të gjuhës amtare.

Për ta kthyer këtë mbrëmje në një atmosferë shkollore nxënësit e shkollës shqipe në Uster dhe Grupi i valleve të shoqatës “Bashkimi” në Uster kishin përgatitur disa recitime, këngë dhe valle. Valltarët e shoqatës “Bashkimi” defiluan me një prezantim mjaft të bukur, me vallen “mozaik”.

Dhe pas valles u ftuan të gjithë semimaturantët, të cilëve mësuesit e tyre iu dhuruan mirënjohje, lule dhe suksese në të ardhmen.

Në emër të shkollës shqipe falënderoi nxënësja e shkollë shqipe, Fjolla Osmani, e cila në fjalën e saj tha:

“Të nderuar prindër, Unë quhem Fjolla Osmani, vij nga Tetova dhe jam nxënëse e klasë së tetë në shkollën shqipe në Birr të Kantonit të Argaut. Sot kam vendosur të flas para jush, me qëllim që fjala ime të dëgjohet, jo ndoshta te ju, që i keni dërguar fëmijët në shkollën shqipe dhe e keni kryer një obligim ndaj fëmijëve tuaj, por që Ju, fjalët e mia t`ua përcillni të gjithë atyre që i njihni dhe nuk i dërgojnë fëmijët në shkollën shqipe. Po flas si nxënëse e shkollës shqipe, sepse gjuha e nënës është pasqyrë e jona. Sa më bukur, sa më mirë që e flasim atë, aq më shumë vlerë kemi. Të gjithë ata që mendojnë se gjuha shqipe këtu në Zvicër nuk na duhet e kanë gabim, asgjë nuk mund ta zëvendësoj gjuhën e nënës. Unë kam pasur nderin që prindërit e mi të kërkojnë që unë mësimet në gjuhën shqipe t`i ndjek detyrimisht, sepse ne fëmijët shpesh gjërave nuk ua njohim edhe kuptimin plotë”.

Dhe në fund grupi i valleve i shoqatës “Bashkimi” e përmbylli mbrëmjen me këngë dhe valle.