CH-Ballkani

Shkup: Pavarësisht bojkotit, tenori Ramë Lahaj mban koncertin

Tenori me famë botërore, Ramë Lahaj, është bojkotuar nga Orkestra e Operës së Maqedonisë Veriore, për koncertin e tij në kuadër të Festivalit të Skenës së Muzikës Serioze Shqiptare.

Pavarësisht këtij bojkoti, tenori arriti ta mbajë koncertin, përcjell albinfo.ch.

Lahaj tha se me këtë veprim u vërtetua që pala maqedonase në vazhdimësi ka tendenca për t’i bojkotuar aktivitetet kulturore të shqiptarëve.

Drejtori i këtij festivali, Fatos Lumani, e ka arsyetuar me telashe teknike anulimin e Orkestrës së Operës së Maqedonisë, për ta shoqëruar Lahajn gjatë interpretimit. 

Por, për dallim nga muzikantët maqedonas, pianisti Genc Tukiçi mori rrugë nga Parisi për në Shkup që ta shoqëronte në koncert mikun e tij Ramë Lahaj. I shoqëruar nga sopranoja ruse Venera Gimadieva, baritoni nga Bullgaria, Kiril Monolov dhe mezzo-sopranoja nga Maqedonia e Veriut, Marika Popoviq, Lahaj, në sallën e Operës në Shkup, interpretoi disa nga ariet më të njohura të literaturës së muzikës klasike botërore.

Edicioni i shtatë i Skenës së Muzikës Serioze shqiptare, gjatë muajit prill, do të sjellë edhe gjashtë koncerte të tjera.