Pas propozimit të Putinit, Ukraina e “gatshme” për bisedime direkte, kërkon armëpushim fillimisht

Keystone (AP Photo/Efrem Lukatsky)

Presidenti i Ukrainës, Volodymyr Zelensky, ka deklaruar se është “i gatshëm” të takohet me presidentin e Rusisë, Vladimir Putin, për të biseduar për arritjen e një armëpushimi, teksa e ka cilësuar si sinjal pozitiv për përfundimin e luftës thirrjen nga Moska zyrtare për bisedime të drejtpërdrejta.

Përmes një postimi në rrjetin social “X”, Zelensky ka shkruar se është “sinjal pozitiv që rusët më në fund kanë filluar të mendojnë për përfundimin e luftës. Hapi i parë i domosdoshëm është arritja e një marrëveshjeje për armëpushim”, transmeton albinfo.ch.

Ndryshe, gjatë një konference për shtyp në Moskë, Putini e shpërfilli thirrjen për një armëpushim të shpejtë 30-ditor në luftën në Ukrainë dhe kërkoi të zhvillojë bisedime të drejtpërdrejta dhe “pa parakushte” me Ukrainën, me gjasë në Stamboll më 15 maj.

Ndonëse nuk e ka përmendur drejtpërdrejt thirrjen për armëpushim, Putin propozoi “rifillimin” e bisedimeve për paqe, që u zhvilluan mes Rusisë dhe Ukrainës në prill të vitit 2022. Ai deklaroi se së shpejti do të flasë me presidentin e Turqisë, për të kërkuar ndihmën e tij për t’i ndërmjetësuar bisedimet në Stamboll.

“Ne nuk e përjashtojmë mundësinë që, gjatë këtyre bisedimeve, të arrijmë ndonjë marrëveshje për një armëpushim të ri”, shtoi Putin.