Koronavirusi: çast pas çasti

Përkundër koronavirusit, 1000 veta në ndeshjen ilegale të futbollit në Lozanë

"Duke pasur parasysh numrin e madh të njerëzve të pranishëm, ndërhyrja nga policia mund të kishte qenë kundërproduktive dhe madje e rrezikshme" ka thënë një zëdhënës i policisë së qytetit në Lozanë

Një ndeshje jozyrtare e futbollit në mbrëmjen e të enjtes ka tërhequr gati 1.000 të rinj në Lozanë, shkruan sda.ch. Ndeshja është zhvilluar përkundër faktit se për shkak të koronavirusit ngjarjet masive janë të ndaluara prej tashmë më shumë se dy muajsh.

Policia nuk ka arrestuar askënd, por ka hapur një hetim për të identifikuar ata që janë përgjegjës për ngjarjen, transmeton albinfo.ch. “Duke pasur parasysh numrin e madh të njerëzve të pranishëm, ndërhyrja nga policia mund të kishte qenë kundërproduktive dhe madje e rrezikshme” ka thënë një zëdhënës i policisë së qytetit në Lozanë, për Radio RTS të Zvicrës perëndimore.

Policia ka mbajtur distancën e tyre për të parandaluar trazirat e mundshme.

Loja e egër u zhvillua në Les Boveresses, në zonën e sipërme të qytetit të Lozanës. “Ne e dinim se diçka po zihej atje, por nuk e dinim vendndodhjen e saktë. Prandaj ishte e vështirë për të parandaluar lojën paraprakisht”, ka thënë zëdhënësi i policisë.

Kjo lloj grumbullimi masiv i të rinjve duket të jetë organizuar përmes rrjeteve sociale, përcjell albinfo.ch. Edhe lojëra tjera të ngjashme janë zhvilluarnë kantonin e Vaudit gjatë ditëve të kaluara. (Sda)