Pragë, çfarë u tha për Kosovën?

Në një konferencë për media nga samiti i liderëve të Komunitetit Politik Evropian në Pragë, presidentja Vjosa Osmani-Sadriu tha se një model i Asociacionit të komunave me shumicë serbe që ngjan me Republikën Srpska në Bosnjë, nuk duhet të realizohet në Kosovë, përcjell albinfo.ch.

Për këtë është shprehur me optimizëm, por ka thënë se duhet jemi të kujdesshëm sa i përket atij takimi, pasi aty nuk përfundon gjithçka dhe se ka shumë hapa të tjerë deri në hyrjen në fuqi të lëvizjes pa viza.

Presidentja Osmani tha se në këtë takim ka biseduar edhe për dialogun e Kosovës me Serbinë, ku ka bërë të qartë vijat e kuqe të Kosovës.

“Sa i përket kryeministrit të Greqisë e kam takuar edhe dy herë më herët në takime bilaterale të detajuara për raportet ndërmjet Kosovës dhe Serbisë, pra është hera e tretë që po e takoj, ndërkaq kryeministrin e Sllovakisë është hera e parë që e takoj. Këto janë shtete që nuk e kanë njohur Kosovën, por të dyja kanë qëndrime konstruktive, sepse asnjëherë nuk e kanë bllokuar rrugën evropiane të Kosovës”, është shprehur presidentja.

Osmani-Sadriu është shprehur se presin që takimi i 13 tetorit, ku takohet grupi punues për viza, do të dëgjohet nga të gjitha këto shtete duke na përkrahur zëshëm, pavarësisht çfarë qëndrimi kanë sa i përket pavarësisë.

“Shpresojmë dhe natyrisht jemi optimist, por edhe të kujdesshëm sa i përket atij takimi. Por nuk përfundon gjithçka aty se ka shumë hapa të tjerë deri në hyrjen në fuqi. Me rëndësi është që sot një rivlerësim i Komisionit Evropian, i është dërguar të gjitha shteteve anëtare është jashtëzakonisht pozitiv, dhe në të njëjtën kohë ky rikonfirmimim i KE-së i njofton të gjitha shtete anëtare edhe për të gjitha reformat që janë kryer këtë 1 vit e gjysme duke i vlerësuar ato si reforma pozitive”, tha ajo.

Presidentja bëri me dije se në të gjitha takimet që ka pasur, homologët e kanë potencuar se sa shumë i vlerësojnë reformat që Republika e Kosovës i ka ndërmarr përgjatë këtij një viti e gjysmë.

“Për shtetet skeptike që kanë qenë më herët sa i përket vizave, reformat kanë qenë determinuese në vendimin e tyre dhe këtë e kanë thënë secili prej tyre në këto takime”, deklaroi Osmani.

Presidentja e Republikës së Kosovës, gjatë vizitës në Pragë, ka zhvilluar një takim trilateral me presidentin e Francës, Emmanuel Macron dhe kancelarin e Gjermanisë, Olaf Scholz.

Presidenca njofton se në këtë takim Osmani ka falënderuar Francën dhe Gjermaninë për angazhimin e tyre për liberalizim të vizave për Kosovën, duke përmendur rëndësinë vendimtare që ky proces të përfundojë gjatë Presidencës çeke të Këshillit të BE-së.

“Në këtë drejtim, Presidentja Osmani ka rikonfirmuar marrëdhëniet e shkëlqyera me Francën dhe Gjermaninë, si aleatë të fuqishëm të Kosovës në kontinentin evropian”, thuhet në njoftim.

Osmani ka përsëritur qëndrimin se “anëtarësimi i Kosovës në strukturat euroatlantike është domosdoshmëri për të garantuar paqe të qëndrueshme dhe stabilitet në rajon”.

Duke folur për procesin e dialogut me Serbinë, Presidentja Osmani ka theksuar se Kosova vazhdon të mbetet palë konstruktive në këtë proces dhe ka falënderuar Francën dhe Gjermaninë për përpjekjen e tyre për ta intensifikuar procesin e dialogut.

Osmani gjatë vizitës në Pragë ka takuar edhe kryeministren e Mbretërisë së Bashkuar, Liz Truss, presidentin turk, Recep Tayyip Erdogan, etj.

Në samitin e Pragës janë ftuar krerët e 44 shteteve evropiane. Ftesë nuk kanë marrë Rusia dhe Bjellorusia.

---