Presidenti i Austrisë, me investitorë, nesër në Kosovë

Ai do të shoqërohet nga përfaqësuesit e 25 bizneseve austriake të cilët kanë investuar apo janë kandidatë potencialë për të investuar në Kosovë

Austria's President Heinz Fischer speaks during a news conference after meeting with Lebanon's President Michel Suleiman at the presidential palace in Baabda, near Beirut, April 26, 2012. Fischer arrived on Thursday to Lebanon for a two-day official visit. REUTERS/ Mohamed Azakir (LEBANON - Tags: POLITICS)

Presidenti i Austrisë, Heinz Fischer nesër nis vizitën e tij dy ditore në Kosovë. Ai do të shoqërohet nga përfaqësuesit e 25 bizneseve austriake të cilët kanë investuar apo janë kandidatë potencialë për të investuar në Kosovë. Bashkë me ta në këtë delegacion do të marrin pjesë edhe disa firma të shqiptarëve nga Austria të cilat janë pjesë e Rrjetit të Bizneseve Shqiptare në Austri.

Delegacioni do të qëndrojë më 28 dhe 29 tetor në Prishtinë dhe, përveç takimeve në nivelin politik, do të marrë pjesë edhe në forumin e bizneseve nga Austria dhe Kosova.

Sipas Zyrës së Presidencës së Kosovës  gjatë vizitës presidenti Fischer do të sjellë me vete investitorë austriakë të cilët krahas me bizneset kosovare do të zhvillojnë një forum ekonomik për të diskutuar mundësitë e investimit në Kosovë.

“Në kuadër të kësaj vizite do të nënshkruhen një sërë marrëveshjesh në fushën e ekonomisë dhe të mjekësisë. Ai po ashtu do të takojë kryetarin dhe Kryesinë e Kuvendit, si dhe kryeministrin Mustafa”, thuhet në njoftimin e Zyrës për informim të presidentes.

Në realizimin e kësaj vizite kontribut të çmueshëm ka dhënë edhe Oda Ekonomike e Kosovës si partnere e respektuar e Odës Federale Ekonomike të Austrisë dhe Zyrës Tregtare pranë Ambasadës së Austrisë në Kosovë.

Në kuadër të vizitës së presidentit Fischer më 28 tetor në “Hotel Swiss Diamond” në Prishtinë do të mbahet takimi B2B në mes të firmave austriake dhe atyre nga Kosova.

Ndërsa 29 tetor do të mbahet forumi më i madh ekonomik i dy vendeve në të cilin do të marrin pjesë presidentët e të dy vendeve, Atifete Jahjaga dhe Heinz Fischer, ministrat e Financave dhe Tregtisë e Industrisë të Kosovës dhe kryetarët e odave ekonomike të Kosovës dhe Austrisë.

Presindenti austriak nuk do të flasë para deputetëve nga shkaku i bllokadës

Gjatë vizitës së Presidentit të Austrisë në Kosovë ishte paraparë të mbahet edhe një fjalim para deputetëve në Kuvendin e Kosovës por si pasojë e bllokimit të seancave, kjo që nuk do të ndodhë. Këtë e ka konfirmuar edhe vet kryeparlamentari Kadri Veseli.

“Këtë javë kemi një mysafir të veçantë në Kuvendin e Kosovës, presidentin e Austrisë z. Heinz Fischer. Ishte dëshira e tij, e një miku të nderuar të vendit tonë, që t’u drejtohet me një fjalë rasti të zgjedhurve të popullit të Kosovës. Fatkeqësisht, kjo nuk do të ndodhë.  Arsyet janë të qarta dhe të kuptueshme, bllokimi i dhunshëm dhe antidemokratik i punës së Kuvendit. A është kjo alternativa e opozitës për vendin? Të izolojë Kosovën dhe ta lërë atë pa miq në këtë botë të trazuar? A është kjo tradita jonë e mikpritjes kur të vjen miku në shtëpi për të nderuar dhe ti nuk ke mundësi ta nderosh?”, ka njoftuar ai përmes faqes së tij.