Presidenti i Këshillit Evropian, Antonio Costa, viziton Kosovën

Integrimi evropian, dialogu dhe reformat pritet të jenë në qendër të takimeve me udhëheqësit kosovarë

Presidenti i Këshillit Evropian, Antonio Costa, do të qëndrojë sot për një vizitë zyrtare në Kosovë, në kuadër të turneut të tij në vendet e Ballkanit Perëndimor, përcjell albinfo.ch.

Gjatë qëndrimit në Prishtinë, Costa do të zhvillojë takime me udhëheqësit më të lartë institucionalë dhe përfaqësues të skenës politike. Sipas agjendës së paralajmëruar, ai do të takohet me ushtruesen e detyrës së Presidentes së Kosovës, Albulena Haxhiu, si dhe me kryeministrin në detyrë, Albin Kurti.

Vizita përfshin edhe takime me përfaqësues të partive politike, ndërsa temat kryesore të diskutimit pritet të jenë procesi i integrimit evropian të Kosovës, reformat demokratike, dialogu rajonal dhe perspektiva e zgjerimit të Bashkimit Evropian.

Ndërkohë, Policia e Kosovës ka njoftuar se do të ndërmarrë masa të përkohshme për rregullimin dhe kontrollin e trafikut, me qëllim garantimin e sigurisë gjatë zhvillimit të aktiviteteve zyrtare të delegacionit evropian.

Vizita e Antonio Costas vjen në një periudhë të rëndësishme për raportet ndërmjet Kosovës dhe Bashkimit Evropian, në kohën kur vendi synon avancimin e mëtejmë të agjendës së tij evropiane./Albinfo.ch

---