Lajme

Prindërit e Iliasit flasin para fillimit të gjykimit të vrasëses së të birit

Vrasësja e Iliasit 7 vjeçar do të dalë para gjyqit të hënën, më 10 gusht. Tani për herë të parë prindërit e tij flasin publikisht për krimin.

Vrasja në Bazel e vogëlushit shqiptar Iljasit pati tronditur gjithë Zvicrën. Jetës së tij të shkurtë i dha fund në mënyrë gjakftohtë, më  21 mars 2019 në orën 12:37 pensionistja A.F.

Media të shumta zvicerane i kushtojnë artikull të veçantë fillimit të gjykimit të pensionistes zvicerane që para rreth një vitin e gjysmë i shoi jetën vogëlushit shqiptar Ilias M. Albinfo.ch përcjell në gjuhën shqipe tekstin e botuar në “20minuten” ku, për herë të parë për tragjedinë flasin prindërit e Iliasit të ndjerë.

E armatosur me thikë, 76-vjeçarja kishte sulmuar nga prapa me thikë fëmijën gjatë rrugës së tij nga shkolla për në shtëpi, shkruan albinfo.ch. E kishte goditur dy herë me thikë pastaj ishte përkulur mbi fëmijën për të parë nëse dëmtimet ishin fatale. Vetëm pas kësaj ishte larguar nga vendi i krimit, shkruhet në aktakuzë.

Një orë më vonë ajo i qe drejtuar policisë. Siç zbulojnë hetimet, A.F. ka terrorizuar autoritetet me letra për dekada, dhe vrasja ishte menduar gjithashtu për të tërhequr vëmendjen e autoriteteve.

“Pa të, bota për ne është e shkatërruar”

Gjykimi i pensionistes fillon në Gjykatën Penale të Bazelit të hënën, 10 gusht. Tani prindërit e Illiasit bëjnë për herë të parë një deklaratë publike. Ata gjithashtu do të jenë të pranishëm në proces. Është e rëndësishme për ta që të shohin gruan që u vrau të birin dhe të mësojnë sa më shumë që të jetë e mundur.

“Unë kurrë më nuk do të jem mirë, por duhet të jetojmë disi. Kemi dy fëmijë që na japin forcë dhe na duhen. Por na mungon Iliasi çdo sekondë, çdo minutë. Pa të, bota është prishur” thotë nëna për “20 minuten”.

Iliasi ishte një djalë i lumtur, shton babai: “Ai qeshte vazhdimisht dhe pothuajse kurrë nuk qante. Të gjithë e donin Iliasin për shkak të natyrës së tij të hapur. Ai shpesh përshëndeste fëmijët e panjohur duke i përqafuar. Iliasi gjithmonë i ndihmonte kolegët më të dobët dhe më vonë donte të bëhej oficer policie. Ai ishte gjithnjë polici në lojën “Grabitësit dhe Poli”.

Në ditën e krimit, nëna ishte në spital ku po shërohej pas një operacioni. Vëllai i vogël i Iliasit ishte i sëmurë, përcjell albinfo.ch. Kjo është arsyeja pse babai kishte qëndruar në shtëpi dhe nuk kishte shkuar, siç ishte planifikuar fillimisht, të merrte Iliasin nga shkolla për të vizituar nënën së bashku.

“Pasi që Iliasi nuk u kthye në shtëpi, unë telefonova shkollën nga spitali. Ishte një police në anën tjetër të linjës. Ajo më pyeti nëse isha nëna e Iliasit. Fillova të dridhem. E ndjeja se kishte ndodhur diçka e keqe. Policja tha që kishte ndodhur një aksident i rëndë dhe Iliasi është operuar në urgjencë. Unë bërtita, u shkëputa  nga tubat e infuzionit dhe shkova në spitalin e fëmijëve”, thotë nëna.

(KEYSTONE/Georgios Kefalas)

“Ne luteshim së bashku jashtë sallës së operacionit dhe shpresonim që Iliasi të mbijetonte. Dy mjekë erdhën tek ne pas dy orësh. Unë vetë punoj në kujdesin shëndetësor dhe menjëherë ndjeva se puna ishte keq. Mjekët thanë që Iliasi nuk ia doli. Ata na treguan se çfarë kishte ndodhur saktësisht”, shton babai.

Ata mësuan për për vrasjen nga media

Se nuk bëhej fjalë për aksident, prindërit dyshuan që në fillim. Mediat tashmë ishin përplot me raporte për krimin, transmeton albinfo.ch. A.F. kishte njoftuar për aktin e përgjakshëm para se të futej në burg.

Vëllai i vogël Iliasit ishte dy  vjeç kur vdiq shtatë vjeçari. Ai e di që vëllai i tij ka vdekur dhe është varrosur. Ne i themi atij se Iliasi është tani në parajsë. Tani ai është një engjëll i vogël.

Ne nuk i kemi thënë akoma se çfarë krimi të tmerrshëm e çoi atë atje. Ndonjëherë ai shkon në ballkon, shikon lart në qiell dhe pyet: ‘Ilias, pse nuk vjen që të luash me mua?’ Ai i mungon atij. Ata ishin gjithmonë bashkë dhe të pandashëm. Sot ai dëshiron të blejë lodra për Iliasin në dyqan.

Ndonjëherë kërkon vëllain e tij të madh në park dhe dëshiron të dijë nëse është në tokë. Ai e bën këtë sepse edhe vetë ishte në varrim dhe e njeh varrin e tij. Është një fëmijë i zgjuar”, shpjegon nëna.

A.F. është shpallur në disa raporte mjekësore si e papërgjegjshme penalisht. Sipas një raporti, ajo vuan nga një “çrregullim i kronifikuar, i rëndë, i delirit” në të cilin gjendet që nga viti 1977, transmeton albinfo.ch. Në vitin 2002, ajo qe klasifikuar si “plotësisht e papërgjegjshme” ndërsa nga viti 2008 ishte e “patronizuar” (nën kujdestari).

Në një raport të mëparshëm, në vitin 2016, një psikiatër kishte bërë një prognozë të negative për të, por megjithatë kishte arritur në përfundimin se rreziku për të kryer ndonjë krim ishte i ulët, për këtë arsye nuk qe urdhëruar strehimi me kujdestari.

Prokuroria publike kërkon që dorasja e 21 marsit 2019 të mbahet në një klinikë të mbyllur psikiatrike.