Protestuesja që hoqi shaminë në publik, dënohet me një vit burgim

Foto ilustrim

Një grua iraniane, që frymëzoi protestat antihixhab duke hequr në publik shaminë, është dënuar me një vit burgim.

Avokati Payam Derefshan tha se një gjykatë e ka dënuar Vida Movahed në muajin mars, pasi e gjeti fajtore për inkurajimin “e korrupsionit”. Movahed ishte arrestuar nëntorin e vitit të kaluar.

Derefshan tha se Movahed është në listën për falje nga lideri suprem i vendit, por se procedurat për falje, sipas tij, ende nuk kanë përfunduar.

Lidhur me këtë rast, autoritetet iraniane ende nuk kanë komentuar, transmeton REL, përcjell albinfo.ch.

Lideri suprem, Ayatollah Ali Khamenei, zakonisht lëshon dekretet për faljen e të burgosurve.

Movahed, 32-vjeçare, më 2017 ishte arrestuar për një kohë të shkurtër, për shkak se kishte hequr në publik shaminë e kokës. Nën akuza të njëjta, po atë vit, autoritetet kishin arrestuar edhe 29 gra të tjera.