Qeveria zvicerane shqyrton taksën për imigracionin

Raporti tregon se një “taksë hyrëse” për të huajt ka pengesa ligjore dhe nuk sjell përfitime të qarta ekonomike

Qeveria e Zvicrës ka analizuar një raport mbi mundësinë e vendosjes së një takse për imigracionin, e cila do të funksiononte si një “tarifë hyrëse” për shtetasit e huaj që vendosen në vend, përcjell albinfo.ch.

Sipas Këshillit Federal, modeli i vetëm që konsiderohet i zbatueshëm pa ndryshime kushtetuese është një taksë me karakter nxitës, ku të ardhurat do të shpërndaheshin më pas për popullatën dhe ekonominë.

Megjithatë, zbatimi i një takse të tillë për shtetasit e vendeve të BE-së dhe EFTA-s do të binte ndesh me marrëveshjen për lëvizjen e lirë të personave që Zvicra ka me Bashkimin Evropian.

Raporti, i kërkuar nga Parlamenti pas një iniciative të Partisë Popullore Zvicerane në vitin 2023, nuk ka gjetur përfitime të qarta ekonomike nga kjo masë. Qeveria thekson gjithashtu se një taksë e tillë do të përballej me pengesa të shumta ligjore në zbatim. /Albinfo.ch

---