Serbia lehtësoi marrjen e kredive për pjesëtarët e organizatave terroriste “Mbrojtja Civile” dhe “Brigada e Veriut”

Presidenti i Serbisë, Aleksandër Vuçiq, një ditë më parë ka takuar ambasadorët e QUINT-it në Beograd. Vendimi i Bankës Qendrore të Kosovës për ndalimin e qarkullimit të dinarit serb ka bërë që Vuçiq të diskutojë për këtë çështje me këta ambasadorë.

Në këtë takim nga pala serbe ishte i pranishëm edhe drejtori i Bankës Postare Kursimore të Serbisë, Bojan Kekiq. Kekiq mësohet se është mik i presidentit të Serbisë, Aleksandër Vuçiq dhe kryekriminelit, i cili udhëhoqi sulmin terroristit të 24 shtatorit në Banjskë, Milan Radoiçiq.

Siç shihet nga pamjet e takimit të djeshëm në presidencën e Serbisë, Bojan Kekiq është i ulur menjëherë pranë drejtorit të së ashtuquajturës Zyrës për Kosovën në Qeverinë e Serbisë, Petar Petkoviq.

Përveç kësaj, siç merr vesh Radiotelevizioni i Kosovës, Kekiq ka arritur marrëveshje me Milan Radoiçiqin për lehtësimin e marrjes së kredive për pjesëtarët e organizatave të shpallura terroriste “Mbrojtja Civile” dhe “Brigada e Veriut”.

Më tej burimi thekson se Radoiçiq u kishte thënë pjesëtarëve të organizatave terroriste se ka biseduar me Drejtorin e Bankës Postare Kursimore, Bojan Kekiqin, në mënyrë që ata të jenë pjesë e sistemit bankar të Serbisë, si për pranimin e pagave, ashtu edhe për marrjen e kredive.

Madje, nga fotot duket se Kekiq është mik shumë i afërt me Milan Radoiçiqin.