Sërish deklarata kontradiktore për Demarkacionin

Zëvendëskryeministri  Fatmir Limaj, tha se gjatë muajit të ardhshëm do të përmbyllet Demarkacioni me Malin e Zi, “me një variant tjetër që do t’i respektojë interesat e dy vendeve”. Kjo deklaratë ngjalli reagime në Prishtinë

Nj deklaratë e zëvendëskryeministrit të Kosovës, Fatmir Limaj se odisejada e Demarkacionit me Malin e Zi do të mbyllet në muajin tjetër, me një marrëveshje të kënaqshme për dy shtetet, ka ngjallur reagime kontradiktore në Kosovë. Përfaqësuesit e opozitës dhe analistët politikë këtë deklaratë e konsiderojnë të pabazë.

Fatmir Limaj që konsiderohet si njeriu i dytë për nga fuqia në Qeverinë e Ramush Haradinajt, tha dje në një intervistë se gjatë muajit të ardhshëm do të përmbyllet Demarkacioni me Malin e Zi, “me një variant tjetër që do t’i respektojë interesat e dy vendeve”. Ai nuk ka treguar se cila është forma që do t’i kënaqë si qytetarët e Kosovës, ashtu edhe Malin e Zi, por tha se çështja e demarkacionit do të përmbyllet shumë shpejt.

“Demarkacioni do të përmbyllet, unë pres që muajin e ardhshëm do të shkojmë dhe do ta kemi shumicën në Parlamentin e Kosovës për të përmbyll këtë çështje…Do të jetë variant, i cili do t’i respekton interesat e Kosovës dhe të Malit të Zi. Ne po punojmë që kur të shkojmë në Parlament të gjithë t’i duartrokasin variantit që do ta dërgojmë”, tha Limaj.

Në anën tjetër, përfaqësuesit e partive opozitare i vlerësojnë si kontradiktore deklaratat e zyrtarëve të lartë qeveritarë në lidhje me demarkacionin, pasi që, sipas tyre, muajin tjetër nuk mund të sillet një version i ri i Marrëveshjes, derisa Marrëveshja aktuale është dërguar në Kuvend dhe pritet të procedohet në seancë, shkruan “Zëri”.

Sipas tyre, s’mund të ketë version të ri pa u hedhur poshtë versioni aktual i Marrëveshjes së Demarkacionit. Edhe analistët politikë vlerësojnë se pa u hedhur poshtë versioni aktual s’mund të ketë një version të ri për Demarkacionin dhe më pas të rinegociohet Marrëveshja me Malin e Zi.