Shqipëria në Panairin e Turizmit në Holandë

Në fokus të veçantë janë kontaktet biznes-biznes dhe biznes-konsumator, mes Shqipërisë dhe Holandës

Shqipëria për herë të parë është pjesë e Panairit Ndërkombëtar të Turizmit në “Vakantiebeurs”, në Utreht të Holandës. Ky panair ka filluar më 10 janar dhe do të vazhdojë deri më 15, raporton albinfo.ch.

Qëllimi i këtij panairi është prezantimi i paketave turistike përballë turistëve, në një nga tregjet më të mëdha në botë që udhëtojnë jashtë vendit të tyre, siç është ai holandez (i pesti pas Gjermanisë, SHBA-së, Britanisë së Madhe dhe Francës).

Në fokus të veçantë janë kontaktet biznes-biznes dhe biznes-konsumator, mes Shqipërisë dhe Holandës.

Gjatë ditëve të këtij panairi është parashikuar edhe një forum biznesi dhe takime me investitorë të ndryshëm, ku Agjencia Shqiptare e Zhvillimit të Investimeve AIDA, do të shpalosë potencialet për investime që ka Shqipëria, jo vetëm në fushën e turizmit, por edhe në sektorë të tjerë.