Shqipëria, vend problematik në Evropë për pastrimin e parave

Instituti i Bazelit për Qeverisje e ka publikuar indeksin e pastrimit të parave për vitin 2016 dhe Shqipëria është përmirësuar, duke u ngjitur disa shkallë, por sërish ndodhet në listën e vendeve më problematike në Evropë.

Lufta kundër korrupsionit vazhdon të godasë vendet që tregojnë një fuqi të dobët në luftën kundër pastrimit të parave dhe Shqipëria ende mbetet e dobët, sipas indeksit “Basel AML 2016”.

Sipas raportit, pushtetarët e korruptuar shqiptarë dhe krimi i organizuar pastrojnë dhe fshehin jashtë vendit paratë e krimit dhe të korrupsionit.

Sa i takon indeksit për 2016, Shqipëria vlerësohet me 5.04, ndërsa një vit më parë indeksi ishte 5.52. Pra, ka një përmirësim me 0.52%. Sipas vlerësimit, sa më i lartë është indeksi, aq më i lartë është dhe niveli i korrupsionit dhe pastrimit të parave. Shqipëria ndodhet në pozitën e 102 në të gjithë vendet e botës, nga 149, ka pasur përmirësime me 16 vende krahasuar me vitin e kaluar.