Gjermani: Skandal në festën ku ishte prezent edhe kancelari Scholz

Policia gjermane po heton pasi disa gra raportuan se nuk ndiheshin mirë pas një feste të organizuar nga grupi parlamentar i SPD-së, partia e kancelarit Olaf Scholz në Berlin.

Policia e Berlinit tha të shtunën se hetimi nisi pas denoncimit të një 21-vjeçareje, që ndihej e trullosur disa orë pas festës verore të së mërkurës të socialdemokratëve dhe nuk ishte në gjendje të kujtonte mbrëmjen e ditës pasardhëse, shkruan The Washington Post.
Ajo shkoi në spital për kontrolle dhe policia urdhëroi një test gjaku për një analizë të substancave të mundshme toksike.

Gruaja raportohet se ka ngrënë dhe ka pirë në festë, por nuk ka konsumuar alkool, tha policia. Deri të shtunën në mëngjes ishin shfaqur katër raste të tjera me simptoma të ngjashme.
Mediat gjermane raportuan se ka dyshime se ato ishin viktima të të ashtuquajturave “pika nokaut”, të cilat mund të përzihen në pije ose ushqim. Policia tha se janë në pritje të rezultateve të testit.

Bëhet fjalë për një lëng pa shije që përzihet lehtësisht me pijet dhe jep një sërë efektesh si humbje e përkohshme e memories deri në gjendje të fikëti.

Pikat përdoren nga përdhunuesit për të përdhunuar viktimat e tyre, kryesisht gra, pa kujtuar se çfarë kanë bërë.
Më shumë se 1000 persona morën pjesë në festën verore të partisë së kancelarit gjerman, përfshi edhe atë vetë.