Futboll

Southgate me respekt maksimal: Jam i impresionuar nga Kosova

Trajneri i Anglisë ka folur vetëm fjalë të mëdha për Kosova, duke u shprehur se është i impresionuar me formën e Dardanëve

Kosova sonte zhvillon ndeshjen më të madhe që nga pranimi në UEFA dhe FIFA. Dardanët janë mysafirë të Anglisë, në ndeshjen që fillon nga ora 20:45.

Futbollistët e Kosovës kanë impresionuar duke mos pësuar humbje që 15 ndeshje, derisa janë në vendin e dytë me tetë pikë, një më pak se Anglia, që gjithashtu ka një ndeshje më pak të zhvilluar, shkruan albinfo.ch.

Në kampin e Kosovës nuk ka aspak frikë për këtë përballje, derisa trajneri i Anglisë, Gareth Southgate është i mahnitur me formën e Kosovës.

“Do të jetë ndeshje shumë e vështirë. Jam impresionuar nga Kosova”, deklaroi Southgate para ndeshjes.

“Ata kanë ecurinë më të gjatë pa humbje në Evropë, kështu që kjo duhet t’i bëjë njerëzit që të kenë vëmendjen”, shtoi Southgate.

Kosova sonte kërkon mrekullinë, derisa anglezët nuk njohin humbje në kualifikime, që nga viti 2009.