Sveçla jep dorëheqje, ndjehet përgjegjës për vdekjen tragjike të dy fëmijëve

«I kemi paranduluar shumë rreziqe, përfshirë edhe mbylljen e disa gropave. Mirëpo, fatkeqësisht ka qenë e pamundur që të eliminohen të gjitha parregullsitë. Nuk ia kemi dalë që qytetarin me e mbrojtë nga të gjitha ato të këqija që i janë bërë nga ajo trashëgimi që ne e kemi gjetur.

Drejtori i Drejtoratit të Inspeksionit në Komunën e Prishtinës Xhelal Sveçla ka dhënë dorëheqje. «Për shkak të ngjarjes së sotme tragjike në Prishtinë, me ç’rast dy fëmijë kanë humbur jetën në një gropë të mbushur me ujë, ndiej përgjegjësi morale që të ofroj dorëheqjen time», thuhet në një njoftim për shtyp të dërguar nga vetë Sveçla.

«Prej vitit 2014 së bashku me kolegët kam pasë detyrën që ta udhëheq Drejtorinë e Inspeksionit në Komunën e Prishtinës dhe jam krenar që për gjithë këtë kohë kemi kryer punë të mëdha. Kemi ndaluar të gjitha ndërtimet pa leje dhe kemi vënë rend në shfrytëzimin e hapësirës publike. E kemi ndaluar korrupsionin e instaluar qysh pas luftës nga qeverisjet e kaluara dhe i kemi dërguar dhjetëra inspektorë në prokurori.

I kemi rrënuar 119 shtëpi që kanë paraqitur rrezikshmëri për qytetarët..» ka numëruar Sveçla disa nga sukseset e Komunës së Prishtinës..

«I kemi paranduluar shumë rreziqe, përfshirë edhe mbylljen e disa gropave. Mirëpo, fatkeqësisht ka qenë e pamundur që të eliminohen të gjitha parregullsitë. Nuk ia kemi dalë që qytetarin me e mbrojtë nga të gjitha ato të këqija që i janë bërë nga ajo trashëgimi që ne e kemi gjetur.

Uroj që në të ardhmen shoqëria të vetëdijësohet edhe më shumë dhe që kolektivisht të luftohen dukuritë e këqija, sepse vetë së bashku mund ta ndërtojmë një qytet më të mirë, më të sigurtë e për një jetë të dinjitetshme për të gjithë!», thuhet në fund në tekstin e dorëheqjes së Xhelal Sveçlës nga posti i drejtorit të drejtoratit për Inspeksion.