Tragjedi në Mitrovicë: 62-vjeçarja ndërron jetë pasi ra në bunar

Trupi i pajetë është dërguar për obduksion

Një 62-vjeçare ka humbur jetën si pasojë e rënies në bunar, në fshatin Kqiq të Mitrovicës.

Këtë e kanë konfirmuar nga Policia e Kosovës në rajonin e Mitrovicës.

“Ngjarja është raportuar nga familjarët e viktimës rreth orës 12:00. Në vend të ngjarjes, përveç njësive përkatëse të policisë dhe zjarrfikësve, me urgjencë ka mbërritur edhe ekipi mjekësor, ku mjeku kishte konstatuar se viktima ishte pa shenja jete”, ka thënë Avni Zahiti, zëdhënës i policisë në këtë komunë, raportojnë mediat atje, përcjell albinfo.ch.

Ai ka shtuar se hetuesit policorë me autorizim të prokurorit kanë nisur hetimet drejt zbardhjes së rrethanave të vdekjes së 62-vjeçares.

Pas përfundimit të procedurave, në vendin e ngjarjes, me urdhër të prokurorit të rastit, trupi i pajetë i viktimës është dërguar për obduksion.

Sipas rrethanave të ngjarjes, rasti është iniciuar si vdekje e dyshimtë.

---