Trazira në Paris, shkaku i protestave për naftën

Protesta e sotme në kryeqytetin francez, Paris, është shndërruar në dhunë, ku pati përleshje mes protestuesve dhe policisë, e ku vjanë arrestuar rreth 40 persona, transmeton albinfo.ch.

Policia ka hedhur gaz lotjesjellës dhe ujë në drejtim të protestuesve, të cilët tentuan të thyejnë kordonin në sheshin “Champs Elysee”.

Protestuesit ndërtuan barrikada në mes të rrugëve në qendër të Parisit dhe ndezën zjarr. Shumë prej protestuesve të quajtur ‘xhaketat e verdha’ bëjnë thirrje për bllokim të rrugëve në gjithë Francën, përfshirë dhe Parisin.

Zyrtarët u druhen grupeve ekstremiste të djathta dhe të majta, të cilët planifikojnë të depërtojnë në këtë lëvizje. Protestat, të cilat filluan nga shoferët kundër rritjes së taksës së naftës, tani përfshijnë një gamë të gjerë të kërkesave që lidhen me koston e lartë të jetesës së vendit.

Ministri i Brendshëm i Francës, Christophe Castaner, shkroi në Twitter se ishin rreth 200 demonstrues “paqësorë” në “Champs Elysees”, ndërsa 1.500 agjitatorë nga jashtë perimetrit të sigurisë erdhën për t’u përleshur”. Në reagimin e tij në Twitter, Castaner njoftoi se 39 persona janë arrestuar.