Lajme

Vjenë: Shtyhet gjykimi i shqiptarit të dyshuar për vrasjen e bashkëshortes

Ai thuhet se është rrëfyer për ngjarjen vetëm pjesërisht, ndërkohë gjyqi është shtyrë për në shtator

Në shtator të vitit 2019, një çift me prejardhje nga Kosova kishin pasur mosmarrëveshje në banesën e tyre në Vjenë. Pas grindjes, burri dyshohet se me një shkop kishte goditur bashkëshorten. Si pasojë e lëndimeve trupore, gruaja vdes. Çifti ishin të moshës 32-vjeçare dhe kishin tre fëmijë.

Të premten e kaluar, i pandehuri Valdon D. ishte paraqitur para gjyqit rajonal në Vjenë.  Ai thuhet se është rrëfyer për ngjarjen vetëm pjesërisht, ndërkohë gjyqi është shtyrë për në shtator.

Motivi i vrasjes sipas mediave austriake kishte qenë xhelozia e burrit ndaj bashkëshortes. Siç është raportuar edhe më parë, kosovari i cili punonte në një firmë ndërtimi, ishte i bindur se gruaja e tij ishte duke e tradhtuar me një koleg të saj të punës, përcjell Albinfo Austria.

Siç thuhet, Valdon D.  kishte blerë një stilolaps spiuni dhe e kishte fshehur në xhaketën e bashkëshortes. Ndërkohë, viktima e kishte gjetur stilolapsin dhe kishte reaguar ashpër. Ajo kishte provuar që ta hidhte atë nga ballkoni. Tutje, mediat austriake raportojnë se Valdon D. shkon në dhomën e fjetjes, merr një shkop dërrase nga shtrati dhe e godet gruan katër herë.

Pas kësaj ngjarje tragjike, ai shkon i merr fëmijët prej shkollë dhe i dërgon për t’u ushqyer në një restorant. Më vonë, duke mos pasur zgjedhje të tjera, Valdon D. lajmërohet dhe dorëzohet personalisht në polici në Taumbstummengasse.

Çifti jetonte me qira në një banesë në Vjenë, por Valdon D. kishte blerë një shtëpi në rrethinën e Vjenës dhe ishin në rindërtim e sipër,

Avokatët mbrojtës të pandehurit, Wolfgang Blaschitz dhe shqiptari Mirsad Musliu, për këtë arsye theksuan se klienti i tyre ishte vetëm “pjesërisht fajtor”. “Psikika njerëzore është e paparashikueshme”, ka thënë Musliu në fjalën hyrëse. Klienti i tij goditi gruan, por nuk kishte qëllim ta vriste. Kjo flet për faktin se ai ndërtoi shtëpinë për familjen në Schwechat. Ai e donte gruan e tij dhe nuk mund t’ia falte vetes atë që kishte ndodhur.

Gjyqi është shtyrë për datën 25 shtator, ngase gjyqtarët kanë kërkuar të dëgjojnë edhe dëshmitarë të tjerë, edhe njerëz të afërm të çiftit.