Zaev dorëhiqet të martën

Keystone

Kryeministri i Maqedonisë së Veriut, Zoran Zaev, do të thërrasë Këshillin Qendror të LSDM-së të martën, për të zyrtarizuar dorëheqjen e tij nga posti i liderit të partisë. Ky akt do të kryhet në mënyrë që të hapet rruga për kryetar të ri të partisë qeveritare dhe që mandatari i ri zyrtarisht të mund ta njoftojë presidentin se ka shumicë për të formuar qeveri.

Siç tha kryeministri aktual Zaev, procedurat kushtetuese diktojnë që shteti të mos arrijë të ketë votuar qeverinë e re para 14 dhjetorit kur paralajmëronte se Maqedonia e Veriut mund të nisë negociatat për anëtarësim në BE, transmeton Euronews, përcjell Albinfo.ch.

“I dini procedurat kushtetuese. Deri në datën 14 as nuk mund të arrihet zgjedhja e qeverisë së re, nuk mund të zgjidhet mandatari dhe kryeministri i ardhshëm i shtetit. Gjatë kësaj periudhe është e logjikshme që LSDM ta shfrytëzojë kohën dhe ta zgjedhë kryetarin e saj. Prandaj ju njoftoj se do t’u kërkoj organeve të partisë që të organizohet konstatimi i dorëheqjes time të martën dhe të nisë procedura për emërimin e kryetarit të ri, i cili do të jetë mandatari i ardhshëm që do të propozojë qeverinë e re”, u shpreh Zoran Zaev.

Ende nuk dihet se kush do të jetë pasusesi i Zaevit, edhe pse si një ndër emrat më shpesh të përmendur në opinion është ai i Dimitar Kovaçevskit, zëvendësministrit aktual të Financave.

Të martën do të mblidhet edhe kryesia e Alternativës, e cila do të vendosë për hyrje ose jo në qeveri. Varësisht prej epilogut, bisedimet finale për hyrje në qeveri të Alternativës dhe ndarja e posteve do të bëhet nga fundi i javës së ardhshme.