ZDF: Njolla e gjakut me formë të hartës së Zvicrës

Televizioni publik i Gjermanisë ZDF në emisionin e tij shumë të shikuar Auslandsjournal po raportonte për dhunën në Honduras, por si ilustrim të kësaj dhune, shikuesit shohin në ekran një njollë të çuditshme gjaku. Ajo ngjan jashtëzakonisht shumë me hartën e Zvicrës, ndërkohë që asgjë në atë lajm nuk lidhej me Zvicrën.

Mundësinë  që kjo të jetë rastësi, mediet zvicerane e përjashtojnë menjëherë. 20 minuten përkujton se po kjo grafikë ishte parë në vitin 2009 si ilustrim për iniciativën e realizuar në Zvicër për ndalimin e eksportimit të materialeve luftarake.

Redaktori i emisionit, Olaf Claus ndërkaq thotë se “Auslandsjournal”  “asnjëherë nuk publikon mesazhe të fshehura ose gjëra të pashije në ekran. Thjesht, është një dështim i sektorit të grafikës. Kolegia ka gjetur në një portal një fotografi të pambrojtur nga të drejtat e autorit dhe prej saj e ka krijuar grafikën. Se kjo grafikë ka pamjen e hartës së Zvicrës nuk i ka rënë në sy askujt në Gjermani. Për këtë lëshim kërkojmë falje ndërsa autores së grafikës i vjen tmerrësisht keq”.

ZDF është njoftuar për këtë lapsus nga shikuesit zviceranë.