Zvicër: Një e treta e punëkërkuesve përdorin Inteligjencën Artificiale për aplikime

Ilustrim, Pixabay

Një e treta e zviceranëve kanë përdorur tashmë Inteligjencën Artificiale si chatbots për aplikimet në punë. Sipas një sondazhi nga platforma Xing, një e treta janë gjithashtu të gatshëm të kryejnë një intervistë pune me një robot, shkruan swissinfo.

Kompania e kërkimit të tregut dhe opinionit Marketagent Schweiz anketoi mbi 1000 punëtorë në Zvicër në emër të Xing, ndërsa rezultatet treguan se një e treta e njerëzve që punojnë deklaruan se kishin përdorur mjete të AI për të aplikuar për një punë të re në dy vjetët e fundit.

Ajo që është veçanërisht e popullarizuar këtu është shkrimi i dokumenteve të aplikimit si CV ose letra motivuese.

Ndërkaq, 35% e të anketuarve thanë se ishin gati për një intervistë pune me chatbot të AI, qoftë me shkrim ose me zë, ndërsa një e treta tjetër e përjashton kategorikisht këtë, sipas sondazhit, përcjell albinfo.ch.

Pjesa tjetër janë mjaft kundër për një intervistë me një robot, por janë gjithashtu të gatshëm ta bëjnë këtë nëse nuk ka alternativë.