Zvicër: Parlamenti ‘shtrëngon’ ligjin kundër pastrimit të parave

(KEYSTONE/Ennio Leanza)

Ligjvënësit zviceranë kanë rënë dakord të rishikojnë ligjin e pastrimit të parave, por kanë hedhur poshtë rregullat e reja për avokatët, noterët dhe këshilltarët e tjerë.

Të mërkurën, parlamentarët paraqitën ndryshimet e tyre të mbetura në rishikimin e Aktit Kundër Pastrimit të Parave. Mazhoranca e krahut të djathtë mbizotëroi me reforma më modeste nga sa kishin shpresuar shumë deputetë të majtë. Në fund të fundit, të dy palët ranë dakord se disa reforma ishin më të mira se asnjë, shkruan swissinfo.ch, përcjell albinfo.ch.

Sipas rishikimit, ndërmjetësuesve financiarë tani do t’u kërkohet të verifikojnë identitetin e klientëve, të regjistrojnë cilat shërbime u janë ofruar atyre dhe të sqarojnë historikun dhe qëllimin e tyre. Asociacioneve që mbledhin ose shpërndajnë fonde jashtë vendit për qëllime bamirësie – të cilat mund të ekspozohen ndaj një rreziku në rritje të financimit të terrorizmit dhe pastrimit të parave – do të kërkohet gjithashtu që të jenë më transparente.

Një rishikim tjetër kryesor është raportimi i aktivitetit të dyshimtë. Parlamenti ra dakord që bankat janë të detyruara të informojnë Zyrën e Raportimit të Pastrimit të Parave Zvicër (MLROS) kur ata kanë ndonjë “dyshim të bazuar” për fondet kriminale, përcjell tutje albinfo.ch.