Zvicër: Për herë të parë në 32 vjetët e fundit bie çmimi i kafesë

Një kafe krem (Café Crème) gjatë vitit 2019 në Zvicër ka kushtuar mesatarisht 4.22 franga, ose 3 rapë më lirë se një vit më parë

Në vitin 2019 për herë të parë në 32 vjetët e fundit në Zvicrën gjermane ka ndodhur të ulet çmimi i një filgjani me kafe, shkruan srf.ch. Edhe pse bëhet fjalë për një zbritje simbolike, prej vetëm 3 rapi (centë), kjo është shënuar nga mediat zvicerane si një lajm me rëndësi.

“Senzacionin” e ka konfirmuar edhe Federata Zvicerane e Kafetierëve “Cafetier Suisse”, transmeton albinfo.ch. Sipas saj, një kafe krem (Café Crème) gjatë vitit 2019 në Zvicër ka kushtuar mesatarisht 4.22 franga, ose 3 rapë më lirë se një vit më parë.

Ndërkohë, vazhdon dallimi në mes të çmimit të kafesë në qytetet dhe atij në zonat rurale. Sigurisht, në zonat urbane për një kafe ende paguhet më shtrenjtë se në ato rurale, por dallimi në çmim tani është më i vogël, bën të ditur federata në fjalë.

Çmimin e kafesë e ndikojnë në mënyrë të konsiderueshme, veç kostos së lëndës së parë, edhe ato të pagave të punonjësve dhe qiraja e lokaleve.

Zviceranët konsiderohen ndër konsumuesit më të mëdhenj të kafesë në botë, shkruan albinfo.ch. Megjithatë, statistikat thonë se në vitin 2018 ata kanë pirë mesatarisht nga 975 kafe, ose për 25 sosh më pak se në vitin 2017.

---