Zviceranët konsumojnë mishin tre herë më shumë se që rekomandohet

Ndërsa konsumimi i qumështit është dukshëm më i ulët se sa është e rekomanduar. Sipas “menuCH” zviceranët konsumojnë dy në vend se tri porcione në ditë të ushqimeve në fjalë

Është prezantuar sot studimi i parë mbi shprehitë e të ushqyerit të zviceranëve (menuCH). Ndër rezultatet më të dukshme të këtij studimi është se zviceranët konsumojnë shumë më tepër mish se që këshillohet (meshkujt: katër fish më shumë) ndërkohë që konsumojnë më pak prodhime të qumshtit.

Gjetje tjera interesante të studimit janë ato se njerëzit sot ushqehen më shpesh jashtë shtëpisë dhe se gratë ushqehen më shëndetshëm se burrat.

Zviceranët mesatarisht konsumojnë 780 gramë mish dhe prodhime të mishit në javë. Kjo është trefish më shumë se mesatarja e rekomanduar, e cila është 240 gramë në javë. Për më tepër, meshkujt konsumojnë afërsisht dyfish më shumë mish se femrat, gjegjësisht 980 gramë në javë.

Po ashtu studimi ka konstatuar se ushqimet e ëmbla dhe ato të njelmëta, ashtu si dhe yndyrërat si gjalpi, margarina, ajka e të ngjashme konsumohen katër herë më tepër se sa rekomandohet.

Ndërsa konsumimi i qumështit është dukshëm më i ulët se sa është e rekomanduar. Sipas “menuCH” zviceranët konsumojnë dy në vend se tri porcione në ditë të ushqimeve në fjalë. Në Zvicrën gjermane konsumimi i prodhimeve të qumështit është më i lartë se ai në Zvicrën Frankofone dhe italiane.

Studimi po ashtu ka shtruar edhe pyetjen se sa shpesh zvicerani mesatar ushqehet jashtë shtëpisë. Dhe ka ardhur në përfundimin se më shumë se një e treta e popullatës (35%) nuk hanë kurrë ushqim të ngrohtë në shtëpi në kohë dreke. Ndërsa darka edhe më tutje vazhdon të konsumohet më shüesh në shtëpi, gjegjësisht të gatuhet. Vetëm 19% të të anketuarve nuk e bëjnë këtë asnjëherë.

Në përgatitjen ose gatimin e një racioni të ngrohtë në shtëpi, mesatarisht investohen 38 minuta. Gratë, me kalimin e moshës investojnë më shumë kohë në përgatitjen e ushqimit, ndërsa meshkujt e moshës mesaatare më shumë se ata të moshës së re dhe të tjerët, të moshës së shtyrë.

Për këtë studim janë pyetur rreth 2000 persona të moshës madhore në gjithë Zvicrën lidhur me shprehitë e tyre ushqimore.