Koronavirusi: çast pas çasti

Zvicra hap kufijtë me zonën e Shengenit më së voni më 6 korrik

Lëvizja e lirë e njerëzve dhe liria e udhëtimit në të gjithë zonën Shengen duhet të rikthehen më së voni deri më 6 korrik

Në kuadrin e masave drejt heqjes së gjendjes së jashtëzakonshme në vend, qeveria e Zvicrës ka njoftuar sot edhe hapat e zbutjes së regjimit të kalimit të kufijve.

Këshilli Federal planifikon të rihapë gradualisht kufijtë nga mesi i qershorit. Lëvizja e lirë e njerëzve dhe liria e udhëtimit në të gjithë zonën Shengen duhet të rikthehen më së voni deri më 6 korrik, transmeton albinfo.ch. Kjo u njoftua nga Këshilli Federal të mërkurën.

Siç është paralajmëruar tashmë, nga 15 qershori do të mundësohen përsëri udhëtimet midis Zvicrës dhe Gjermanisë, Francës dhe Austrisë, pa kufizime. Megjithatë, është ende e paqartë se kur do të hiqen kontrollet kufitare për Italinë.

Nga 8 qershori, në kufijtë zviceranë mund të urdhërohen kontrollet për njerëzve që duan të hyjnë nga vendet e përcaktuara si shtete me rrezik.