25 vjet nga Masakra e Polacit në Skenderaj

Polac, Skendera Albin Kurti, FB

7 prilli shënon 25-vjetorin e Masakrës së Polacit në Skenderaj, ku vranë 86 shqiptarë. 78 prej tyre ishin civilë dhe 8 ushtarë të Ushtrisë Çlirimtare të Kosovës.

Nga të vrarët në Polac, 12 persona ishin nga lagjja Kerolli, 11 nga lagjja Kabashi, 11 nga lagjja Veliu, 11 nga lagjja Xani, 8 nga lagjja Koci, 4 nga lagjja Aliuka, 3 nga lagjja Hoti, si dhe nga lagje të tjera.

Kryeministri i Kosovës, Albin Kurti, ka kujtuar të vrarët nga ushtria serbe. Ai u shpreh se pas vrasjeve, preokupim për Serbinë ishte fshehja e krimeve.

“Pas fushatave vrastare të kryera mbi shqiptarët e Kosovës, preokupimi më i madh i shtetit të Serbisë ishte fshehja e këtyre krimeve dhe zhdukja e gjurmëve, që kryesisht synohej përmes zhdukjes së trupave të pajetë. Shtatë banorë të Polacit janë ende të pagjetur, teksa autoritetet e Serbisë i refuzojnë dhe i bishtnojnë bashkëpunimit me drejtësinë ndërkombëtare. Në kohën e luftës, 20 banorë të Polacit u mbijetuan plagëve”, u shpreh ai.

Tutje, Kurti thotë se shteti i Kosovës nuk do të ndalet së kërkuari drejtësi për viktimat.

“Gjatë viteve 1998-1999, policia dhe ushtria e Serbisë e dogjën dhe e shkatërruan pothuajse tërësisht fshatin Polac. Mbi 450 shtëpi banimi, oda pritjesh e ahrije u dogjën, duke e vështirësuar edhe më shumë kthimin në fshat dhe rindërtimin e jetës në Polac pas luftës. Shoqëria dhe shteti i Kosovës do të kujdesen për trashëgiminë e luftës së popullit të Kosovës. Nuk do të reshtim së kërkuari drejtësi për viktimat, për krimet dhe dëmet e luftës në drejtim të kriminelëve dhe në adresë të urdhërdhënësve të tyre”, shkroi ai.