Brezovica, ndër 10 vendskijimet më të “çmendura” në botë

Ndër këto destinacione që bën portali gjerman mopo.24 hyjnë: Qiproja, Libani, Irani, Tasmania, Afrika e Jugut, Siria, Izraeli, Kashmiri, Kosova dhe, merreni me mend, edhe Koreja e Veriut!

“Nuk është e thënë që vetëm Alpet tona të jenë vendi ku bëhen sportet me ski. Jo dhe aq larg nga ne, në Kosovën e vogël gjendet njëri ndër vendskijimet më të bukura në malet e Ballkanit, shkruan portali gjerman mopo24.de.

Në fakt këtu ka vetëm 9 teleferikë, 15 kilometra pista të rregulluara dhe një biletë ditore prej vetëm 9 eurove, dhe ky është çmimi për kulmin e sezonit. Ata që i ndjekin çmimet e lira mund ta bëjne një pushim të mirë dimëror në Kosovë me fare pak para.

Ky portal ka bërë radhitjen e 10 vendeve për skijim që gjenden në vendet më jotipike për këtë sport ose për pushimet dimërore në përgjithësi, transmeton albinfo.ch. Këtu hyn Qiproja, Libani, Irani, Tasmania, Afrika e Jugut, Siria, Izraeli, Kashmiri, Kosova dhe, merreni me mend, edhe Koreja e Veriut. Kështu, Kosova nuk është në një shoqëri veçanërisht të mirë por, së paku i njihet një resurs që e posedon.