Feith: Qeveria duhet të ketë fytyra të reja

Përfaqësues të bashkësisë ndërkombëtare duan që qeveria e ardhshme e Kosovës të jetë e përbërë nga personalitete të reja, që nuk kanë qenë deri më tani pjesë e ekzekutivit kosovar. Shefi i Zyrës Civile Ndërkombëtare (ICO), Pieter Feith, njëherësh i dërguar i posaçëm i BE-së në Kosovë, ka thënë se pret që qeveria e re të jetë vërtet e re.

Në një intervistë dhënë Kohës Ditore, Feith ka thënë se ka shumë mesazhe për zhvillimet në Kosovë dhe për “renë e zezë që ka rënë mbi imazhin e Kosovës”. Ai se pret që qeveria e ardhshme të ketë ministra kredibilë, dhe që pjesë e asaj të mos jenë zyrtarët që janë nën hetime.

Feith nuk ka nguruar të paralajmërojë se një veprim i kundërt mund t’i kushtojë Kosovës me humbje të kredibilitetit dhe të reputacionit në Bruksel dhe Washington. “Ajo që inkurajon tej mase është se ka një vetëdijesim të përgjithshëm, se kjo situatë përveç që është serioze, krijon edhe një mundësi që të ketë një fillim të ri. Dhe mendoj se ka vullnet që kjo të bëhet. Unë do të jem shumë i interesuar. Do të jem i interesuar, sepse mendoj se ky moment ka rëndësi për Kosovën”.

Shefi i ICO-së ka thënë në këtë intervistë se e di që zgjedhjet e fundit kanë qenë me mashtrime dhe se të zgjedhurit do të kenë problem legjitimiteti. Por, Feith ka bërë thirrje për ndryshim mentaliteti, ndërkaq ka kërkuar që legjitimitetin qeverisja e ardhshme ta fitojë pikërisht duke emëruar njerëz kredibilë në udhëheqje të punëve.