Gjenerali Buehler shkëmbeu informacione me ushtarakët maqedonas

Komandanti i KFOR-it, gjeneralmajori Erhard Buehler, dje, gjatë turneun përgjatë vendeve të Ballkanit, ka qëndruar në një vizitë të shkurtër zyrtare në Maqedoni.

“Gjenerali Buehler shkëmbeu pikëpamjet me Shefin e Shtabit të Forcave të Armatosura të Maqedonisë, gjenerallejtënant Miroslav Stojanovski, i cili ishte i shoqëruar nga oficerë të lartë të Shtabit të Përgjithshëm të Ushtrisë së Maqedonisë”, thuhet në një njoftim të KFOR-it.

Në takimin me Stojanovskin, gjenerali Buehler prezantoi një përshkrim të plotë për gjendjen në Kosovë nga pikëpamja e KFOR-it dhe informoi autoritetet vendore ushtarake mbi çështjet dhe ngjarjet që kanë të bëjnë me KFOR-in. Ai shpjegoi se KFOR-i me numër të reduktuar të ushtarëve do të veprojë në mbarë Kosovën me dy Grupe LuftueseShumëkombëshe, e të cilat nuk kanë zona specifike rajonale të përgjegjësisë. Sipas Buehlerit ato do të operojnë nën komandën e drejtpërdrejtë të tij, me fleksibilitet, lëvizshmëri dhe gatishmëri të shtuar.

Për detyra rajonale do të ketë pesë Detashmente të Përbashkëta Rajonale (DPR) me Ekipet e tyre të Ndërlidhjes dhe Monitorimit (ENM) për të mbajtur kontaktin me të gjithë njerëzit në Kosovë.

Komandanti Buehler ua ka bërë me dije zyrtarëve maqedonase se KFOR-i është ende i fortë pas riorganizimit dhe do t’i kryejë detyrat e veta me efikasitet dhe sukses. “Në këtë mënyrë, KFOR-i dhe NATO do t’i kontribuojnë stabilitetit të gjithë rajonit brenda dhe rreth Kosovës”, thuhet në njoftimin e KFOR-it.

Gjatë qëndrimit në Shkup, komandanti i KFOR-it u takua me zyrtarë të Ministrisë së Punëve të Brendshme për t’u informuar mbi çështjet e sigurisë kufitare.