Serbët bllokojnë kufirin, anulohet vendimi për letërnjoftimet ilegale

Me kërkesën e Ambasadës amerikane në Kosovë dhe Bashkimit Evropian, Qeveria e Kosovës, thotë se e ka shtyrë zbatimi i vendimit për letërnjoftimet ilegalë

Pika kufitare e veriut që ndan Kosovën dhe Serbinë në Jarine, ka qenë e mbyllur për më shumë se një orë nga protestuesit serbë, të cilët kundërshtonin vendimin e Qeverisë së Kosovës, që të ndalohet hyrjen në territorin e Kosovës për serbët që posedojnë letërnjoftime të lëshuara nga strukturat paralele. Protestuesit kanë kërkuar shfuqizimin e këtij vendimi.

Ndërkohë, sipas një njoftimi lëshuar nga Qeveria e Kosovës, thuhet se me kërkesën e Ambasadës amerikane në Kosovë dhe Bashkimit Evropian, është shtyrë zbatimi i këtij vendimi. Për këtë çështje pritet të diskutohet në takimin e ardhshëm, të martën, në Bruksel.

Sipas Qeverisë në Prishtinë, ministrja kosovare për Dialog, Edita Tahiri, është ftuar nga Bashkimi Evropian në një takim urgjent në Bruksel, për të biseduar “në lidhje me çështjet urgjente në Dialogun e Brukselit”, dhe një nga temat do të jetë edhe “ndalimi i vazhdimit të lëshimit të letërnjoftimeve nga strukturat paralele serbe për serbët kosovarë.

Ministrja Tahiri, të premten ka deklaruar se që nga 18 prilli nuk do tu lejohet hyrja në Kosovë personave që kanë “karta identiteti jolegale, të cilat i kanë lëshuar strukturat paralele të Serbisë në Kosovë”. Ajo pati theksuar se pas shumë përpjekjeve të bëra përgjatë dialogut në Bruksel që të ndërpritet përdorimi i mëtejshëm i dokumenteve të tilla, kjo nuk ka ndodhur edhe më tej.

Dragan Jabllanoviq, kryetar i Komunës së Leposaviqit, duke folur për REL, ka theksuar se gjatë mëngjesit të ditës së hënë, ka biseduar me zyrtarët e Policisë së Kosovës, të cilët, siç ka thënë ai, ia kanë konfirmuar se nuk ka pasur asnjë urdhëresë zyrtare që të zbatohet çfarëdo mase.

“Qarkullimi i njerëzve dhe mallrave është i lirë dhe nuk ka nevojë për bllokim, sepse në këtë mënyrë e bllokojmë popullin tonë”, ka theksuar Jabllanoviq, sipas të cilit, “në rast e vjen deri te zbatimi i vendimit të autoriteteve të Kosovës, bllokimi do të zbatohet jo vetëm ndaj njerëzve, por edhe ndaj mallrave”.